Канон Пасхальный ко Пресвятой Богородице в память принесения Честнаго Ея Пояса в пределы Российския
Октябрь 27th 2011 -
Тропарь, глас 4-й
К Богородице прилежно ныне притецем, грешнии и смиреннии, и припадем, в покаянии зовуще из глубины души: Владычице, помози на ны милосердовавши, потщися, погибаем от множества прегрешений, не отврати Твоя рабы тщи, Тя бо и едину надежду имамы.
Не умолчим никогда, Богородице, силы Твоя глаголати, недостойнии, аще бо Ты не бы предстояла, молящи, кто бы нас избавил от толиких бед, кто же бы сохранил до ныне свободны, не отступим, Владычице, от Тебе, Твоя бо рабы спасаеши присно от всяких лютых.
Канон, глас 1-й
Песнь 1
Ирмос: Воскресения день, просветимся, людие, Пасха, Господня Пасха: от смерти бо к Жизни и от земли к Небеси Христос Бог нас преведе, победную поющия.
Запев: Пресвятая Богородице, спаси нас.
Очистим чувствия, и узрим в неприступном свете Матерь Света, и радуемся, рекуще: радуйся, Мати Господня.
Пресвятая Богородице, спаси нас.
Небеса убо достойно да веселятся, земля же да радуется, да празднуют же вернии, почитающие заступление Богоматери.
Слава: Умерщвление предел сломила еси, Вечную Жизнь рождшая, Христе, из гроба возсиявшаго днесь, Дево Всенепорочная, и мир просветившаго.
И ныне: Воскресшаго видевши Сына Твоего и Бога, радуйся со Апостолы, Богоблагодатная Чистая, и еже — радуйся — первее, яко всех радости вина, восприяла еси, Богомати Всенепорочная.
Песнь 3
Ирмос: Приидите, пиво пием новое, не от камене неплодна чудодеемое, но нетления источник, из Гроба одождивша Христа, в Немже утверждаемся.
Пресвятая Богородице, спаси нас.
Ныне вся исполнишася радости неизреченныя, видимая же и невидимая, ныне празднует светло стадо Твое, Владычице, Тобою обещанное заступление.
Пресвятая Богородице, спаси нас.
Виждь, Чистая, соборы паствы Твоея, окружающих всечестный Пояс Твой, грехов разрешения просящих, и жития исправления, и причастия Божественныя славы Твоея, Всенепорочная.
Слава: Течет благодать независтная от Твоего, Богородице, Пояса, всем источающи, молящимся тепло, зол избавление, и здравие, и милость.
И ныне: Всею душею и мысли правостию в пастве Твоей вси ликующе, псалмы, и песньми духовными, и пением Божественным, обстоят Всечестный Пояс Твой, Пречистая, Ты же, неотступна сущи, подаждь помощь, Богоневесто.
Господи, помилуй (трижды). Слава, и ныне:
Песнь 4
Ирмос: На Божественней стражи Богоглаголивый Аввакум да станет с нами и покажет светоносна Ангела, ясно глаголюща: днесь спасение миру, яко воскресе Христос, яко всесилен.
Пресвятая Богородице, спаси нас.
Се Пречистая грядет: услышав людие потекли во сретение, и свет велий осени землю Русскую, паче солнца сияющь, и зрят Пречистыя Пояс и паде, моляся о заступлении.
Пресвятая Богородице, спаси нас.
Не ужасайтеся, людие: приидох посетити землю Русскую Пояс Богоматери, да услышит Царица-Богомати молитву слёз народа Своего.
Слава: Богоотец убо Давид пред сенным ковчегом скакаше, играя, Твоим же заступлением веселится блаженное стадо Твое, сбытие словес Твоих зряще, Богоневесто.
И ныне: Реку Тя сладкую и поток насыщения, манну Небесную, мед от камене, изобилие и благодать приснотекущую стяжавше, Отроковице, в земле Русской обитающии благодарно поют о Твоем заступлении.
Песнь 5
Ирмос: Утренюем утренюю глубоку, и вместо мира песнь принесем Владыце, и Христа узрим, Правды Солнце, всем жизнь возсияюща.
Пресвятая Богородице, спаси нас.
Безмерное Твое предстательство, еже показуеши присно, Всепречистая, стаду Твоему, зряще, вопием Ти ныне веселою душею: радуйся, Марие Богоневесто.
Пресвятая Богородице, спаси нас.
Приступим, свещеноснии, ко Поясу Девы днесь, множество монашествующих, и спразднуем любопразднственными чинми посещение Богоматери.
Слава: Неотступна убо буду от народа Божьяго, — вещала еси, Владычице — и се со словом дело являеши, Царице Всенепорочная.
И ныне: Певаемая Отроковице Дево, чудеса Твоего заступления удивляют человеком помышления, паче бо слово спасение улучи Тобою хранимая земля Русская.
Песнь 6
Ирмос: Снизшел еси в преисподняя земли и сокрушил ecи вереи вечныя, содержащия связанныя, Христе, и тридневен, яко от кита Иона, воскресл еси от Гроба.
Пресвятая Богородице, спаси нас.
Призри благосердно на паству Твою, Пречистая, и, якоже обещалася еси, потребная подавай неоскудно, снабдящи и покрывающи Твоея помощи и заступления тепле ищущия.
Пресвятая Богородице, спаси нас.
Спасе мой Преблагий и всяческих Творче, Чистыя Богородицы благоприятными мольбами соблюди Твоя певцы невредимы от всяких бед.
Слава: Да избавятся от всех злоключений чтущия Тя, Богородице Дево, вражды, огня и глада, во единомыслии воспевающи, Помощницу Тя имущи.
И ныне: Поем Тя и покланяемся Ти, Богомати, не презри молений рабов Твоих, заступи в бедах наших, яко сущи милостива.
Господи, помилуй (трижды). Слава, и ныне:
Кондак, глас 8-й
Аще и во гроб снизшел еси, Безсмертне, но адову разрушил еси силу и воскресл еси, яко Победитель, Христе Боже, женам мироносицам вещавый: радуйтеся! и Твоим Апостолом мир даруяй, падшим подаяй воскресение.
Икос
Еже прежде солнца Солнце, зашедшее иногда во гроб, предваривша ко утру, ищущия яко дне мироносицы девы, и друга ко друзей вопияху: о другини! приидите, вонями помажем Тело Живоносное и погребеное, плоть Воскресившаго падшаго Адама, лежащую во гробе; идем, потщимся, якоже волсви, и поклонимся и принесем мира, яко дары, не в пеленах, но в Плащанице обвитому, и плачем, и возопиим: о Владыко, востани, падшим подаяй воскресение.
Песнь 7
Ирмос: Отроки от пещи избавивый, быв Человек, страждет яко смертен, и страстию смертное в нетления облачит благолепие, един благословен отцев Бог и препрославлен.
Пресвятая Богородице, спаси нас.
Отроки от пещи Избавльшаго, Чистая, Ты родила еси нетленною Твоею, Богорадованною утробою, по Рождестве, яко прежде Рождества, Сохраншаго Тя, Егоже и молящи не престай о нас, воспевающих Тя.
Пресвятая Богородице, спаси нас.
Вси ныне соберитеся, плещуще празднственная на просторах земли Русской и Христову Матерь прославите, едину, паче Херувим несравненную и Серафим препрославленную.
Слава: Яко воистинну священный, и спасительный и зареносный, Дево, Пояс Твой поклоняющимся бо сему здравие раздаеши и милость телес же и душ, и взыскающим надежная еси Помошница, Бога плотию рождшая.
И ныне: Монашествующии и вси человецы страхом и радостию ныне поклонимся Поясу Богоотроковицы, молящися всем миром и вопиюще: Радуйся, Благодатная, еже Гавриилово Благовещение.
Песнь 8
Ирмос: Сей нареченный и Святый День — един суббот царь и господь, праздников праздник и торжество есть торжеств, в оньже благословим Христа во веки.
Пресвятая Богородице, спаси нас.
Сей нареченный и Святый День всех созывает к духовному веселию, срящим убо сей радостно и возопием: радуйся, Богородице, во вся веки.
Пресвятая Богородице, спаси нас.
Приидите, людие, исполнимся Божественного благоухания, заступлением Божия Матери, и, Сию прославляюще, поклонимся, поющи присно во вся веки.
Пресвятая Богородице, спаси нас.
Возведи окрест очи Твои, Чистая, и виждь: се бо приидоша к Тебе, яко Богосветлая светила, от запада, и севера, и моря, и востока чада Твоя, поклонитися Твоему Всечестному Поясу.
Пресвятая Троице, Боже наш, слава Тебе.
Отче Вседержителю, и Слове, и Душе, Безначальное Существо и Непостижимое Естество, Боже всех, землю Русскую изми от всякия скорби мольбами воистину Чистыя Единыя Богородицы.
Песнь 9
Ирмос: Светися, светися, Новый Иерусалиме, слава бо Господня на тебе возсия, ликуй ныне и веселися, Сионе, Ты же, Чистая, красуйся, Богородице, о восстании Рождества Твоего.
Пресвятая Богородице, спаси нас.
Светися, радуйся, монашествующих множество, изряднее же играй, земля Русская, ликуй ныне и веселися светло, ибо обрела еси Чистую Деву, Блюстительницу Непобедимую.
Пресвятая Богородице, спаси нас.
О, Божественнаго, о, любезнаго, о, неистощимаго пролияния Твоих безмерных чудес, имиже, Чистая, землю Русскую обогащаеши, ибо слава ея в Твоем заступлении: Ты вратарница ея и утверждение.
Слава: О Мати Дево! в молитву приносим Тебе мольбы угодников Твоих, в земле Русской просиявших, молим Тя вси: избави нас от всякия напасти и озлобления.
И ныне: Да сохраниши, Дево, сущаго стадоначальника земли Русской, радуйся, Неискусобрачная Честная, сохрани стадо Твое от всякаго озлобления, Едина Богоневестная.
Молитвы ко Пресвятой Богородице
Царице моя преблагая, надеждо моя Богородице, приятелище сирых и странных предстательнице, скорбящих радосте, обидимых покровительнице! Зриши мою беду, зриши мою скорбь, помози ми яко немощну, окорми мя яко странна. Обиду мою веси, разреши ту, яко волиши: яко не имам иныя помощи разве Тебе, ни иныя предстательницы, ни благия утешительницы, токмо Тебе, о Богомати, яко да сохраниши мя и покрыеши во веки веков. Аминь.
О,Благодатная Богомати, Пренепорочная и Обрадованная, да обрадуемся и мы, немощныя людие Твои, яко Силою и Властию Твоею сокрушиши всех врагов наших видимых и невидимых, да прославим и возвеличим Тя, яко Непобедимую Победу Всесильную.
Cоставленный на основе Пасхального канона Пресвятой Богородице в память посещения Богоматерию преподобного Сергия («Богородичный канонник. Каноны Пресвятой Богородице, чтомые пред Ея святыми иконами. Том 2». Издательство «Лествица» — «Диоптра», Москва — Санкт-Петербург, Леушинское подворье, 2003 год). Для келейного чтения.
