Акафист Пресвятой Владычице Богородице, ради иконы Ея Урюпинская, нарицаемая «Явленная»
Июнь 20th 2011 -
Акафист Пресвятой Владычице Богородице, ради иконы Ея Урюпинская, нарицаемая «Явленная»
Кондак 1
Избранней от всех родов Божией Матери и Царице, явившейся на древе в Донской земле, и славу Свою на святых горах показавшую, больные исцеляти заблудшия обращати. Темже умильно молимся Тебе избави град наш от всякаго зла, да с любовию поем Тебе:
Радуйся, похвало Урюпинская града нашего державо и украшение.
Икос 1
Ангелов Царице всея твари Владычице, Пречистая Дево Богородице! Преславным явлением иконы Твоея святыя всю землю Донскую благодатию озарила еси, и струю чудес от нея источила еси верным. Тем припадающе, с любовию вопием Ти:
Радуйся, явлением иконы Твоея град наш озарившая.
Радуйся, Царице небеси и земли.
Радуйся освященное селение Бога и Слова.
Радуйся, благодатию Божиею и нас освящающая.
Радуйся, спасение падшаго рода человеческаго.
Радуйся, явлением иконы Твоея нас просвещающая.
Радуйся, Дево, христиан похвало.
Радуйся, яко ублажат Тя вси роди.
Радуйся, похвало Урюпинская, града нашего державо и украшение.
Кондак 2
Видяще Богородице икону Твою на древе явившуюся и источник целебный источившую, благочестивая вдовица, приемши икону Твою в дом свой и молящеся Тебе со умилением, поя: Аллилуиа.
Икос 2
Разумевшая явление иконы Твоея, мудрая вдовице тече ко властем, поведающе им явление Твое. Мы же, дивящееся свыше данному вразумлению, благоговейно вопием к Преблагословенней:
Радуйся, явлением иконы Твоея нас возвеселившая.
Радуйся, славою чудес Твоих верных разум озарившая.
Радуйся, скорбь нашу в радость претворяющая.
Радуйся, немощи наша душевныя и телесныя врачующая.
Радуйся, Премилосердная утешительнице всех скорбящих и обремененных.
Радуйся, неусыпная наставнице всех заблудших и ослепленных.
Радуйся, славою чудес Твоих верных разум озаряющая.
Радуйся, сумнящихся известное утверждение.
Радуйся, похвало Урюпинская, града нашего державо и украшение.
Кондак 3
Сила Вышняго осеняет всех с верою и благоговением прибегающих к Твоему пречистому образу, яко Ты еси молящихся помощнице, обидимых заступнице, больных исцеление, слепых прозрение, труждающихся помоще; благодарно вопием о Тебе Богу: Аллилуиа.
Икос 3
Видяще токи чудес, изливаемыя от святыя твоея иконы , благая Богородительнице, в защищение людей скорбящих и погибающих; болящие исцеляхуся и знамения и чудеса бываху всем, прибегающим ко образу Твоему святому , да зовем Ти :
Радуйся, чудесами шествие иконы Твоея знаменовавшая.
Радуйся, многая немощныя исцелившая.
Радуйся, воздыхания и скорби наша неотвергающая.
Радуйся, недостойныя наша молитвы приемлющая.
Радуйся, яко смиренным мольбам рабов Твоих внемлющая.
Радуйся, яко иконою Твоею от всяких бед нас ограждаеши.
Радуйся, яко тою козни вражии разрушаеши.
Радуйся, в час скорби люди Твоя укрепляеши.
Радуйся, похвало Урюпинская, града нашего державо и украшение.
Кондак 4
Бури житейския избегаем и в тихое пристанище спасения, храм Твой, притекаем и обретаем зде утешение благодатное и помощь Божественную от святыя иконы Твоея, Богородице,от нея же лучи чудес испущаеши, вопием Ти: Аллилуиа.
Икос 4
Имея любовь велию к людям, искупленным кровию Сына Твоего и Бога, Владычице Всеблагая, от пречистыя Твоея иконы токи чудес источила еси верным, Пречистая; не презри и нас, благая Владычице, вопиющих Ти:
Радуйся, милости сокровище многоценное.
Радуйся, Ею же ликовствует все множество верных.
Радуйся, Ея же ради рыдает демонское полчище.
Радуйся, всех христиан возжеленная помощнице.
Радуйся, радосте наша и крепкая заступнице.
Радуйся, покрове наш и наше утешение.
Радуйся, похвало наша, чудесы нас удивляющая.
Радуйся, прибежище наше и залог вечнаго спасения.
Радуйся, похвало Урюпинская, града нашего державо и украшение.
Кондак 5
Боготочной звездой явилася еси в Донской земле отцем нашим икона Твоя Владычице, град наш сиянием многих чудес просвети, неоскудно источающи благодатные исцеления всем верным вопиющим: Аллилуиа.
Икос 5
Видевше чудеса преславныя от иконы явления Твоего бывшия Владычице Преблагая, люди Урюпинския со усердием к ней притекаху и в недузех исцеление приемлюще; к ней же и мы ныне приходяще, поклоняемся и чествуем, и от желания сердца глаголем:
Радуйся, скорбящих радосте и обидимых заступление.
Радуйся, печальных утешение и бедствующих помоще.
Радуйся, вдовиц и сирых благосердная попечительнице.
Радуйся, старцев благоговейных сладкое успокоение.
Радуйся, кающихся грешников верная споручнице.
Радуйся, любовь к Богу в сердцах верных насаждающая.
Радуйся, заблудших исправление и юных наставнице.
Радуйся,в явлении иконы Твоея лучами Солнца Правды верных осиявшая.
Радуйся, похвало Урюпинская, града нашего державо и украшение.
Кондак 6
Предстояще пред пречистым Твоим образом,благоговейные людие проповедают великие твоея милости, яко град наш и вся грады ограждаеши, и веси защищаеши, и ведуще Тя воистину помощницу сильну и непобедиму, со слезами приносим ти молитвы,поющее Аллилуиа.
Икос 6
Видение чудесное Богоматери и святыя словеса Ея приемля, приемши твой святый образ во храм, и во время морового поветрия с молебным пением припадающе к Тебе людие Твои, и исцеление получивше, со слезами взываше сице:
Радуйся, во утешение даровавшая нам образ Твой чудотворный.
Радуйся,новую милость и новую благодать нам явившая.
Радуйся,покровительнице наша от бед нас спасающая.
Радуйся, в болезнях наших скорую помощь нам подающая.
Радуйся, теплая ходатаица о живущих во граде Твоем.
Радуйся, всеблагая наша наставнице, любовию нас привлекающая.
Радуйся,хранительнице наша от бед и болезней.
Радуйся, за вся благодеяния Твоя благодарению нас научающая.
Радуйся, похвало Урюпинская, града нашего державо и украшение.
Кондак 7
Хотяще благочестивыя люди достойно перенести Твой честный образ во храм Вознесения Господня и ублажати Тя хвалебно собором. Ты же чудодействием явилася еси на место явления Твоего, да вси удивляшеся чудесам сим, воспеша Богу: Аллилуиа.
Икос 7
Новое знамение милосердия Твоего явила еси, Владычице, в чудесном прославлении святыя иконы Твоея. Вси людие здравии и болящие, богатии и нищие, прибегаем к Тебе; буди милостива к нам, недостойным рабам Твоим, любовию воспевающим Тебе таковая:
Радуйся, приносящая к Сыну Твоему моления верных.
Радуйся, Заступница усердная рода христианскаго от Бога нам дарованная.
Радуйся, предстательнице к Богу, мир от бед спасающая.
Радуйся,благосердная услышительнице молений наших.
Радуйся, за всех нас милостивая к Сыну Твоему и Богу ходатаица.
Радуйся, грешных с Богом примирение.
Радуйся, верных Господеви сочетавшая.
Радуйся, Бога с человеки соединившая.
Радуйся, похвало Урюпинская, града нашего державо и украшение.
Кондак 8
Дивно Тя от небес на святых горах явльшуюся, Ангели воспеша, апостоли прославиша, лик святый восхвалиша, вси люди поклонившася Тебе и прославиша славу Твою, и воспеша Богу: Аллилуиа.
Икос 8
Новая купель Силоамская, явися на святых горах источник Твоего явления: в нем же исцеление почерпаем не едино лето, а всегда язву душевную и телесную врачуеши с верою и любовию прибегающим к Тебе, вопием Ти:
Радуйся, купель в ней же вся скорби наша погружаются.
Радуйся, чаше ея же радость спасения восприемлем.
Радуйся, каменю, напояющий жаждущия жизни.
Радуйся, животворныя воды неистощимый источниче.
Радуйся, подательнице всякия благости.
Радуйся, бане, омывающая греховную скверну.
Радуйся, Царице неба и земли, врата райския нам отверзающая.
Радуйся, домостроительнице, житие наше добре устрояющая.
Радуйся, похвало Урюпинская, града нашего держава и украшение .
Кондак 9
Дивное чудо перенесения преславныя иконы Твоея, Владычице, торжественно вси чествуем, и ежегодно в сей светлый праздник явления Твоего, благодарне воспоминаем вся неисчетная благодеяния чудес, Тобою Пречистая, от иконы дивно источаемых и Тебе поюще: Аллилуиа.
Икос 9
Ветии многовещанныя не довлеют по достоянию воспети хвалу и благодарение Пречистей; мы же православно и несумненно, Приснодевою Тя исповедающе, верно поклоняемся иконе Твоей святей, и вопием Ти сице :
Радуйся, неверных сомнительное слышание.
Радуйся, верных известная похвало.
Радуйся, безматерних сирот незримая воспитательнице.
Радуйся, матерей детородящих скорое и безболезненное разрешение.
Радуйся, умягчение злых сердец.
Радуйся, надежно благ вечных.
Радуйся, верная хранительнице уповающих на Тя по Бозе.
Радуйся, всех верных ограждение и священное прибежище.
Радуйся, похвало Урюпинская, града нашего державо и украшение .
Кондак 10
Спасение ищущи к Тебе всегда прибегаем, милостивая Мати, и чудотворную Твою икону, ныне обстояще, тою отцем нашим во спасение явленную, с любовию воспоминаем, да не оставь и нас ныне, Владычице Пресвятая, умилосердися и спаси,вопиющих к Богу: Аллилуиа.
Икос 10
Стена еси и заступление всем прибегающим с верою к Тебе, Всеблаженная Отроковице, темже молим Тя: заступи, покрый и соблюди всех погибающих от искушений, озлоблений и бед, к Тебе с любовию взывающих:
Радуйся, столпе девства.
Радуйся, чистоты и целомудрия избранный сосуде.
Радуйся,пламень страстей изменяющая.
Радуйся, мрак искушений прогоняющая.
Радуйся, матернюю любовь к нам грешным простирающая.
Радуйся, грешных к покаянию призывающая.
Радуйся, крепкое наше упование.
Радуйся, несумненная наша надеждо.
Радуйся, похвало Урюпинская, града нашего державо и украшение.
Кондак 11
Пение благодарственное приносят Тебе вси благочестивии людие града Урюпинска, светлии дни дивных исцелений начертаны в сердцах верующих и моления теплыя возносятся ежегодно в память сего радостнаго явления. С верою и любовию преклонивше колена, вопием: Аллилуиа.
Икос 11
Светозарную икону Твою, Заступнице наша, с благоговением мы зрим в Божественном храме Твоем. Кто ни прибегал к Тебе, Владычице, кто ни поклонялся Тебе! Приими веру нашу и усердие наше, и услыши моления к Тебе взывающих:
Радуйся, Благодатная, всеми добродетельми преукрашенная.
Радуйся,своею благодатию нас не оставляющая.
Радуйся, хранительнице наша и заступнице.
Радуйся, Царице и Владычице небесе и земли.
Радуйся, града нашего щите и ограждение.
Радуйся, веры православной утверждение.
Радуйся, сильным Твоим заступлением от всех бед нас избавляющая.
Радуйся, любовию к Богу и ближним нас воодушевляющая.
Радуйся, похвало Урюпинская, града нашего державо и украшение.
Кондак 12
Благодать и милость свыше подаждь нам, Владычице, от иконы Твоея явленныя, град наш и храм огради, веру православную утверди. Темже поклоняемся и молимся Тебе, и просим, Владычице Всеблагая: сподоби до конечнаго дыхания нашего пети Тебе: Аллилуиа.
Икос 12
Поем чудеса Твоя и милости, благая Богородительнице,хвалим Тя Пречистая, яко неусыпную хранительницу нашу, со умилением поклоняемся Тебе, Ты же, Всеблагая заступнице, покрый нас честным покровом, и ибави от всякаго зла, да воспеваем Тебе непрестанным гласом хваления:
Радуйся, непостыдное наше упование в животе и по смерти нашей.
Радуйся, в день судный наша надежде и защищение.
Радуйся, землю Донскую возлюбившая.
Радуйся, славу Свою в ней явившая.
Радуйся, Заступнице наша усердная.
Радуйся, молитвенница наша теплая.
Радуйся, надеждо наша непостыдная.
Радуйся, душ наших спасение.
Радуйся, всех праведных слово и утешение.
Радуйся, похвале Урюпинская, града нашего державо и украшение.
Кондак 13
О, Всепетая, Всемилостивая Владычице Богородице, града нашего дивная заступнице! Приемше сие малое моление наше, избави нас от всякия напасти и скорби, недуги исцели, веру укрепи, всякую злобу и вражду отжени от нас и будущия изми муки, вопиющих Ти: Аллилуиа, аллилуиа, аллилуиа.
Сей Кондак читается трижды. А по сем читается Икос 1-й и Кондак 1-й
