Акафист Пресвятей Владычице нашей Богородице в честь и память Чудотворныя Иконы Ея, нарицаемыя «Донския»
Август 31st 2010 -
Акафист Пресвятей Владычице нашей Богородице в честь и память Чудотворныя Иконы Ея, нарицаемыя «Донския»
Донская икона БМ
Кондак 1
Взбранной Воеводе победительная, яко избавльшеся от злых, благодарственная восписуем Ти раби Твои, Богородице, но яко имущая державу непобедимую, от всяких нас бед свободи, да зовем Ти: радуйся, Владычице милостивая, в напастех скорая заступнице (в обычные дни). Другой припев: радуйся, Владычице милостивая, града Москвы и страны нашея скорая заступнице.
Икос 1
Архангела благовестие слышавши о неведомем зачатии, Дева Пречистая соизволи воле Господа Своего и со смирением от боголюбивейшаго сердца отвеща: «Се раба Господня, буди Мне по глаголу Твоему». Мы же дивящеся, како Сын Божий Сын Девы бывает, со Гавриилом благодатную песньми почтим:
Радуйся, Отроковице, от всех родов Богоизбранная.
Радуйся, скиние, Духом Святым осененная.
Радуйся, живоносная обитель Света Божественнаго.
Радуйся, Мати Божия, Спаса миру рождшая.
Радуйся, Приснодево, пророков исполнение.
Радуйся, Богоневесто, Бога-Слова плотию облекшая.
Радуйся, яко Тобою, Владычице, невидимый нам видим бысть.
Радуйся, всепетая, яко сотвори Ти величие сильный.
Радуйся, почитанием икон Твоих величие сие возвещаем.
Радуйся, благодать и милость чудотворною Иконою нам являющая.
Радуйся, Владычице милостивая, в напастех скорая заступница.
Кондак 2
Видяще Тя, Богородице, во объятиях Христа Младенца держащую и главу к Пречистому лику Его кротце приникшую, разумеваем божественную любовь Твою и непрестанное о мире предстательство. В шуйце имаши плат чистый, знаменуя благословенный дар Сына Твоего, во еже слезы плачущих скоро осушати, да никто же отсюду неутешен изыдет. Веруем, яко имаши велие дерзновение ко благосердию Владыки, вся от Него испросити могущи, и Богу, давшему нам благую заступницу, благодарственно поем: Аллилуиа.
Икос 2
Разум немощный не может постигнути высоту смиреннаго служения Твоего, Госпоже, на земли Искупителю нашему, не имевшему где главу подклонити. Оружие смертоносное прохождаше сердце Твое, Пречистая, во вся дни уничижения и страдания Сына невиновнаго. Недоумеем песнословити по достоянию величие души Твоея, толикия скорби претерпевшия; обаче побеждаеми и любовию Твоею с сокрушением сердца глаголем:
Радуйся, незлобивая Агнице, вертеп и ясли смиренно приявшая.
Радуйся, Богоприимца скорбное проречение в сердце начертавшая.
Радуйся, Мати Света, во тьму египетскаго идолослужения со Младенцем безтрепетно бежавшая.
Радуйся, Спутнице странствию Владычню неразлучная.
Радуйся, поношением праведника сострадавшая.
Радуйся, крестный путь Сына Человеческаго слезами оросившая.
Радуйся, муки распятаго сердцем разделившая.
Радуйся, безмолвным Кресту предстоянием послушание воле Отца явившая.
Радуйся, гробу Сына Твоего благосердый плач принесшая.
Радуйся, Чистая, и красуйся, Богородице, о восстании рождества Твоего.
Радуйся, Владычице милостивая, в напастех скорая заступнице.
Кондак 3
Сила Вышняго содела Тя, Благодатная, источник неоскудевающ утешения бедствующим, многи бо скорби претерпевши, можеши и искушаемым помощи. Людем Российским люте страждущим от нашествия Агарян, благоволила еси явити образ Твой в струях реки Дона в знамение милости Твоея ко Отечеству нашему в защиту от враг видимых и невидимых, от них же избавляеми, поем победителю Богу: Аллилуиа.
Икос 3
Имуще Тя первую подвигоположницу, шествующую по стопам Владыки Христа, мужества исполняхуся Первосвятителие Московстии и подвижницы благочестия, учаще народ духом Господеви работати, беды и напасти терпети, ибо сила Божия в немощи совершается. Мы же, видяще веру Отец наших и явление благодати, нравы злыя в добрыя претворившую и вражду племен во единство крепкое обратившую, достойно Тя, наставницу верных ублажаем:
Радуйся, насаждение веры и благочестия.
Радуйся, образе несокрушимаго скорбей терпения.
Радуйся, надежды несумненныя оправдание.
Радуйся, духа уныния и боязни отгнание.
Радуйся, духа разума и крепости стяжание.
Радуйся, в струях донских Икону чудно явившая.
Радуйся, потоки слез народных Ею изсушившая.
Радуйся, многострадальныя Руси извечная помощнице.
Радуйся печальников святых земле российстей возрастившая.
Радуйся, Владычице милостивая, в напастех скорая заступнице.
Кондак 4
Буря превеликаго нашествия Агарянскаго потрясе землю Русскую, но не возможе угасити пламень веры в покров Твой, Пречистая. Великий печальник наш преподобный Сергий, призвав на помощь Святую Троицу и Тя, Владычице, со упованием благослови Великаго Князя Димитрия с дружиною в поход противу зло-честивых, прорекше: «Победиши враги твоя». И тем научи всех пети всесильному Богу, в Троице славимому: Аллилуиа.
Икос 4
Слышав о пришествии на поле брани Куликовския честнаго Образа Твоего, Заступнице, и прияв от рук иноков послание преподобнаго Сергия с напутием «Да поможет ти Бог и Святая Богородица», возрадовался Князь Димитрий, яко сама Владычица грядет на супостаты и воспрянув духом поведе воины на тьмочисленныя полчища, и победу одержа. Мы же, взирающе на Образ Твой, некогда, яко хоругвь пред ратью носимый, радостно поем похвальная:
Радуйся, пришествием Образа Твоего лучами солнца правды верных облиставшая.
Радуйся, Небесная Воеводо, Мати Господа сил.
Радуйся, ею же силы горния на враги устремляются.
Радуйся, ею же демонския козни внезапу разрушаются.
Радуйся, иноков Пересвета и Ослябю на подвиг ратный укрепившая.
Радуйся, воином мужества неодолимаго дарование.
Радуйся, врага исконнаго грозное низвержение.
Радуйся, Отечество наше от ига Агарянскаго свободившая.
Радуйся, славную победу православным даровавшая.
Радуйся, Владычице милостивая, в напастех скорая заступнице.
Кондак 5
Богоявленною звездою возсия Икона Твоя пресветлая, озаряя сердца верных воинов на брань подвигшихся со Агаряны. Весь день той предстояще преподобный Сергий престолу св. Троицы, пророку Даниилу подражая, моляся Богу и Тебе Царице Небесной, да избавлено будет Отечество от челюстей вражиих. Вечеру уже бывшу победу старец духом провозгласи и благодарственное пение соверши, призывая и нас ныне велегласно воспети всещедрому Богу: Аллилуиа.
Икос 5
Провидев очами веры течение велией битвы, призывая Божие благословение на ратоборцев, поименно поминаше преподобный Сергий убиенных воинов. Мы же, имея завет его память о таковых особо творити, видяще силу молитвы, победу оружию приносящей, сице просим всемощную покровительницу воинства нашего:
Радуйся, воинов непреоборимая споборнице.
Радуйся, прискорбная за Отечество терпети их научающая.
Радуйся, воинский долг совершенно исполнити помогающая.
Радуйся, меч гнева Божия смелым вручающая.
Радуйся, из терния злостраданий венец победы соплетающая.
Радуйся во бранех силу духа даже до подвига возвышающая.
Радуйся, больных и ранами уязвленных не оставляющая.
Радуйся, убиенных на поле брани вечному покою приобщающая.
Радуйся, родителей скорбных благодатное утешение.
Радуйся, взбранная Воеводо, имущая державу непобедимую.
Радуйся, Владычице милостивая, в напастех скорая заступнице.
Кондак 6
Провозвестник спасения Москвы от внезапнаго нашествия крымскаго хана явися Образ Твой, заступнице скорая, с верою и слезным молением обнесоша его людие по стенам и стогнам града и поставиша среди воев в походной церковице Сергия Преподобнаго. Враг нападе в канун праздника Сергиева и кровию оросишася прилежащия веси. Грозной нощи наставшей, супостатом во град внити готовым, малочисленнии защитницы токмо на помощь свыше уповаху, и всемилостивому Спасу в вере непоколебимей взываху: Аллилуиа.
Икос 6
Возсиявшу солнцу, узреша стрегущии, яко опусте стан Агарянский: нощию страх нападе на Хана от некоей велией силы, и бежаша неудержимо полки нечестивых даже за пределы Российстии и вси изгибоша. О, предивная Заступнице наша и богоносне отче Сергие, вашими молитвами скорое избавление сие бысть. Да исполнится же древний храм сей, возвысившийся на месте, идеже стояше чудотворный Образ Донский, гласом хвалы сея:
Радуйся, града Москвы страже неусыпающая.
Радуйся, миротворца князя Даниила начало величию Москвы положити сподобившая.
Радуйся, молитвами Святителей и Сергия преподобнаго град наш ограждающая.
Радуйся, преизящными храмы первопрестольную украсити изволившая.
Радуйся, многажды град со святынями всецело сохранившая.
Радуйся, в день лют плач верных чад в радость претворившая.
Радуйся, коварнаго врага внезапным бегством истребившая.
Радуйся, надежду на помощь твою не посрамившая.
Радуйся, благодатная, яко Тобою с нами Бог.
Радуйся, Владычице милостивая, в напастех скорая заступнице.
Кондак 7
Восхотевши оградити Русь православную, державная Покровительнице наша, многажды козни Агарян и прочих враг разоряще, пределы страны нашей хранящи, и победы даже без крови даяше. Сего ради навыкоша людие издревле на всяко лето чествовати Икону Твою и, яко знамение заступления и победы, по граду Москве с крестным ходом носити и велелепно провожати даже до Донския обители, немолчно взывая Спасителю Богу: Аллилуиа.
Икос 7
Новаго стража неусыпнаго града Москвы достойно почтити хотя, соборный храм начертание и образ четвероконечнаго креста имущий, люди благочестивии в Донстей обители соорудиша. На крылех храма воздвигоша изображение донския Иконы Твоея, Воеводо возбранная, знаменуя сим божественное ограждение страны нашея, да отовсюду находящий врази отражены будут непобедимою силою Креста Господня и неотступными молитвами Твоими. Тебе же, яко выну сущей с нами, со умилением глаголем:
Радуйся, Бога живаго храме одушевленный.
Радуйся, Боголюбивая, страну Российскую достоянием своим избравшая.
Радуйся, око недремлющее, козни вражии прозирающее.
Радуйся, доброе пристанище душам, ищущим спасения.
Радуйся, нощных бдений и молебных пений скорое слышание.
Радуйся, в сретение Сына Своего, с крестным ходом грядущаго, исходящая.
Радуйся, свеще неугасимая, светочи веры воспламеняющая.
Радуйся, силою веры от смерти избавляющая.
Радуйся, града Москвы и страны нашея всемощная предстательнице.
Радуйся, Владычице милостивая, в напастех скорая заступнице.
Кондак 8
Странно сомнящимся видети, како Русь нестроением разделенная не токмо от ига освобождается, но и велия держава содевается. Ты же, Госпоже Владычице Небесная, великую и малую Россию возсоединити благоволившая и силу Отечества в союзе мира и любви тем показавшая, укрепи правую веру в стране нашей и простри покров Твой над воспевающими, вседержителю Богу: Аллилуиа.
Икос 8
Весь мир страждет грех ради человеческих, во зло его повергающих. Се бо от гордости ищущих тленныя славы и зависть исконнаго врага диавола восприявших рождаются кровопролитныя брани. Благодаряще Тя, заступницу державную, за присное избавление Отечества нашего от нашествия язык иноплеменных, просим Тя в мире глубоце вселенную сохранити, Тебе бо дадеся благодать всемирнаго заступления, да вси достойно ублажаем Тя сице:
Радуйся, средостение вражды разрушившая.
Радуйся, Благодатная, яко мир введе и царствие нам отверзе.
Радуйся, Виновница Благая, попрания вечныя смерти.
Радуйся, всему миру покров предивный, тучи гнева Божия отводящий.
Радуйся, всея Вселенной похвало высокая.
Радуйся, прекращением брани радость всем приносящая.
Радуйся, Мати мира страстей волны укрощающая.
Радуйся, Отечеству нашему победы обильныя дарующая.
Радуйся, Икону Твою, яко знамя побед неотъемлемое, дивно даровавшая.
Радуйся, Владычице милостивая, в напастех скорая заступнице.
Кондак 9
Всех немощных крепосте, печальных утешение, страждущих посещение, больных врачевание, кающихся совоздыхание, врагов низложение, внезапныя смерти избавление, Ты, верных дерзновение, Пречистая Владычице Богородице, всех скорбящих под сень Креста приводиши, да вопиют искупителю Богу: Аллилуиа.
Икос 9
Витии многовещанныя не могут исчести, Человеколюбивая Мати, бездну щедрот Твоих на злостраждущия и беспомощныя изливаемых. И мы, сладость утешения в нужде познавши, благословляем Тя с верою и чествуем с любовию, моления вознося пред образом Твоим сицевая.
Радуйся, безмолвие дивное в земных скорбех показавшая.
Радуйся, скорбящих и плачущих отрадо и утешение.
Радуйся, болящих милосердая Целительнице.
Радуйся, долгонедужным сладости райския ниспослание.
Радуйся, омраченным смыслом ума просветление.
Радуйся, страждущих любовию ближних окружающая.
Радуйся, вдов и сирот незримая питательнице.
Радуйся, страдания, яко благодати вестник, встречати научающая.
Радуйся, яко паче жемчуга слезами радости Икона Твоя украшается.
Радуйся, Владычице милостивая, в напастех скорая заступнице.
Кондак 10
Спасти хотя мир, Сын Божий из Тебе, Дево, плотию облекается и благодатию Его падшее естество человеческое грехом оскверненное, очищается, осужденное оправдывается. Сие Божие о нас смотрение Тобою исполняется, яко Ты еси воистину взыскание погибших, и Тобою от отчаяния избавляемии, дерзаем с веселием пети искупителю Богу: Аллилуиа.
Икос 10
Стена еси несокрушимая Церкве Христовой, Всенепорочная Дево, верных бо от искушений оберегаеши, и миром и любовию ограждаеши. Сице посещаеши и домы наша, идеже лампада теплится неугасимая пред Образом Твоим и воздыхания молитвенныя даже и в нощи не умолкают, зовущих Ти:
Радуйся, от купели крещения благая восприемнице.
Радуйся, бедствия сиротства дивное избавление.
Радуйся, супругов любовию благословенною венчание.
Радуйся, беззаконнующих светом правды обличающая.
Радуйся, матерем многотрудным изрядная Помощнице.
Радуйся, чад непокоривых твердая Наставнице.
Радуйся, враждующих нечаемое примирение.
Радуйся, грехи наша в море милосердия растворяющая.
Радуйся, домов благочестивых тихое веселие.
Радуйся, немощной старости сладкое собеседование.
Радуйся, Владычице милостивая, в напастех скорая заступнице.
Кондак 11
Пение всеумиленное приносим Ти, приятелище премудрости Божией грешных спасающей. Ты бо уготовала еси церкви трапезу, на ней же рожденный от Тебе Агнец приходит заклатися и датися в снедь верным. О Мати Слова, сподобляй нас достойно причащатися Пречистаго Тела и Крове Сына Твоего, да получивше грехов разрешение, воспоим жизнодавцу Богу: Аллилуиа.
Икос 11
Светом силы божественныя поражавши, Воеводо Небесная, враг видимых и невидимых; нас же, чад своих, подвизавши на брань и облекавши во вся оружия Божия, яко возмощи нам стати противу козней диавольских, да зовем Ти:
Радуйся, мужество со страхом Божиим в нас вселяющая.
Радуйся, щитом веры стрелы вражий отражати помогающая.
Радуйся, мечем поста страсти отсекати научающая.
Радуйся, трезвением и бдением дух нерадения отгоняти повелевающая.
Радуйся, молитву непрестанную, усердно припадающим дарующая.
Радуйся, дивно чистотою нечистые помыслы попаляющая.
Радуйся, милостынею двери милосердия отверзающая.
Радуйся, миром, яко твердым копией, диавола в трепет приводящая.
Радуйся, исполнением воли Божией паче пищи укрепляющая.
Радуйся, шлемом спасения главу смиренных венчающая.
Радуйся, Владычице милостивая, в напастех скорая заступнице.
Кондак 12
Благодатную помощь многажды являла еси Царице Небесная, чрез Чудотворный Образ Твой Донский, егда смерть вскоре предстояще людем. Сего ради на обратней стране Иконы древния изображено всечестное Успение Твое, да всяк подвизающийся во славу Бога и на благо ближняго, не убоится смерти, но взирая, како душа Твоя восходит к Богу живому, с надеждою предает себя Судии всех, вопия: Аллилуиа.
Икос 12
Поюще Тя, в молитвах неусыпающую Богородицу, Святей Троице предстоящую, вопием Ти: пробуди нас светом живоноснаго Успения Твоего от смертоноснаго сна нерадения о спасении души, испроси нам во еже с Господом примирения, да Тобою водимии, достигнем Царства Небеснаго, зовуще:
Радуйся, обрадованная, во успении Твоем нас не оставляющая.
Радуйся, земли приверженных к горнему Иерусалиму возводящая.
Радуйся, богомыслия кладезю неисчерпаемый.
Радуйся, сокрушение сердца падшим дарующая.
Радуйся, взыскание погибших, заблудших к Богу приводящая.
Радуйся, Утешительнице, причащения животворящих таин сподобляющая.
Радуйся, водительнице, от воздушных врагов души немятежное прешествие.
Радуйся, предстательнице, грешную душу даже от ада восхищающая.
Радуйся, Воеводо, воинов добрых вечною славою венчающая.
Радуйся, благая вратарнице, двери райския верным отверзающая.
Радуйся, Владычице милостивая, в напастех скорая заступнице.
Кондак 13
О, Всемилостивая Владычице Богородице, Российския страны дивная заступнице, плачущих утешение, обидимых прибежище, грешных спасение. Отечество наше от враг защити и вселенную миром благослови. Веру православную укрепи, скорби и крест со упованием понести помози. В любви и согласии всех нас соблюди и в радость Господа внити сподоби, поющих Ему: Аллилуиа.
Этот кондак читается трижды, затем 1-й Икос: «Архангела благовестие...» и 1-й Кондак: «Взбранной Воеводе...».
Метки: Акафист
