Псалтиръ съ возсѣ́лдованіемъ Сѵмво́лъ, ре́кше Исповѣ́даніе, во святы́хъ отца́ на́шего Аѳана́сія, патріа́рха Александрíйскаго
Сентябрь 15th 2011 -
Иже хо́щетъ спасти́ся, пре́жде всѣ́хъ подоба́етъ ему́ держа́ти каѳоли́ческую вѣ́ру, ея́же а́ще кто́ цѣ́лы и непоро́чны не соблюда́етъ, кромѣ́ вся́каго недоумѣ́нія, во вѣ́ки поги́бнетъ.
Вѣ́ра же каѳоли́ческая сія́ е́сть: да еди́наго Бо́га въ Тро́ицѣ, и Тро́ицу во еди́ницѣ почита́емъ, ниже́ слива́юще ѵпоста́си, ниже́ существо́ раздѣля́юще. Ина бо е́сть ѵпоста́сь Отча, и́на Сыно́вня, и́на Свята́го Ду́ха. Но Отчее и Сыно́внее и Свята́го Ду́ха, еди́но е́сть Божество́, ра́вна сла́ва, соприсносу́щно вели́чество. Яко́въ Оте́цъ, тако́въ Сы́нъ, тако́въ и Святы́й Ду́хъ. Несозда́нъ Оте́цъ, несозда́нъ Сы́нъ, несозда́нъ и Святы́й Ду́хъ.
Непостижи́мь Оте́цъ, непостижи́мь Сы́нъ, непостижи́мь и Ду́хъ Святы́й. Вѣ́ченъ Оте́цъ, вѣ́ченъ Сы́нъ, вѣ́ченъ и Святы́й Ду́хъ. Оба́че не три́ вѣ́чни, но еди́нъ вѣ́чный; я́коже ниже́ три́ не созда́нніи, ниже́ три́ непостижи́міи, но еди́нъ несозда́нный, и еди́нъ непостижи́мый. Подо́бнѣ: Вседержи́тель Оте́цъ, Вседержи́тель Сы́нъ, Вседержи́тель и Ду́хъ Святы́й; оба́че не три́ вседержи́тели, но еди́нъ Вседержи́тель. Та́ко: Бо́гъ Оте́цъ, Бо́гъ Сы́нъ, Бо́гъ и Ду́хъ Святы́й; оба́че не три́ Бо́зи, но еди́нъ Бо́гъ. Ра́внѣ: Госпо́дь Оте́цъ, Госпо́дь Сы́нъ, Госпо́дь и Ду́хъ Святы́й; оба́че не три́ Госпо́діе, но еди́нъ е́сть Госпо́дь. Зане́, я́коже осо́бно ку́юждо ѵпоста́сь, Бо́га и Го́спода исповѣ́дати, христіа́нскою и́стиною понужда́емся: та́ко три́ Бо́ги, или́ три́ Го́споды глаго́лати, каѳоли́ческимъ благоче́стіемъ возбраня́емся. Оте́цъ ни отъ кого́ е́сть сотворе́нъ, ни созда́нъ, ниже́ рожде́нъ. Сы́нъ отъ Отца́ Самаго́ е́сть, не сотворе́нъ, ни созда́нъ, но рожде́нъ. Ду́хъ Святы́й отъ Отца́ не сотворе́нъ, ни созда́нъ, ниже́ рожде́нъ, но исходя́щъ. Еди́нъ у́бо [е́сть] Оте́цъ, не три́ отцы́; еди́нъ Сы́нъ, не три́ сы́ны; еди́нъ Ду́хъ Святы́й, не три́ ду́си святíи. И въ се́й [Святѣ́й] Тро́ицѣ ничто́же пе́рвое или послѣ́днее, ничто́же бо́лѣе или́ мнѣ́е, но цѣ́лы три́ ѵпоста́си, соприсносу́щны су́ть себѣ́ и ра́вны; си́це я́ко да по всему́, я́коже предрече́ся, Тро́ица во Еди́ницѣ, и Еди́ница въ Тро́ицѣ почита́ется. Хотя́й у́бо спасти́ся, та́ко о Святѣ́й Тро́ицѣ да му́дрствуетъ.
О Христѣ́. Но ну́жно е́сть къ вѣ́чному спасе́нію, да и о воплоще́ніи Го́спода на́шего Іису́са Христа́ извѣ́стно вѣ́руетъ. Есть же права́я вѣ́ра, да вѣ́руемъ и исповѣ́дуемъ, я́ко Госпо́дь на́шъ Іису́съ Христо́съ, Сы́нъ Бо́жій, Бо́гъ и человѣ́къ е́сть. Бо́гъ отъ существа́ Отча пре́жде вѣ́къ рожде́нный, и человѣ́къ е́сть отъ существа́ ма́терня, во вре́мени рожде́нный. Соверше́нный Бо́гъ и соверше́нный человѣ́къ, отъ души́ слове́сныя и человѣ́ческія пло́ти состоя́й. Ра́венъ Отцу́ по Божеству́, мнíй Отца́ по человѣ́честву. Иже а́ще и Бо́гъ е́сть и человѣ́къ, оба́че не два́, но еди́нъ е́сть Христо́съ. Еди́нъ же не премѣне́ніемъ Божества́ въ пло́ть, но воспрія́тіемъ человѣ́чества въ Божество́. Еди́нъ вся́ко, не слія́ніемъ есте́ствъ, но еди́нствомъ ѵпоста́си. Якоже бо душа́ слове́сная и пло́ть — еди́нъ е́сть человѣ́къ, та́ко Бо́гъ и человѣ́къ — еди́нъ е́сть Христо́съ, пострада́вый спасе́нія на́шего ра́ди, и соше́дый во а́дъ, и въ тре́тій де́нь воскресы́й изъ ме́ртвыхъ, и возше́дый на небеса́, и сѣ́дый одесну́ю Бо́га и Отца́ Вседержи́теля; отону́дуже пріи́детъ суди́ти живы́мъ и ме́ртвымъ. Его́же прише́ствіемъ вси́ человѣ́цы воскре́снутъ съ тѣлесы́ свои́ми и воздаду́тъ о свои́хъ дѣ́лѣхъ Отвѣ́тъ: И у́бо блага́я содѣ́явшіи по́йдутъ въ жи́знь вѣ́чную, зла́я же — во о́гонь вѣ́чный.
Сія́ е́сть каѳоли́ческая вѣ́ра. Ея́же а́ще кто́ вѣ́рно и извѣ́стно вѣ́рити не бу́детъ, спасти́ся не возмо́жетъ.
Псалти́ръ. — М.: Въ Сѵнода́льной Тѵпогра́фіи, 1782. — Л. 1 – 1 об.
источник:«Русскiй Порталъ»
