Псалтиръ съ возсѣ́лдованіемъ. Анаста́сія блаже́нного, патріа́рха вели́кія Антіохíи, и Кири́лла Александрíйского
Сентябрь 15th 2011 -
Изложе́ніе вкра́тцѣ о вѣ́рѣ, и вопро́сы и отвѣ́ты о богосло́віи
Вопро́съ: Ко́ея вѣ́ры еси́?
Отвѣ́тъ: Христіа́нинъ е́смь.
Вопро́съ: Что́ е́сть христіа́нинъ?
Отвѣ́тъ: Иже въ Бо́зѣ живе́тъ, и благочести́вно и благолюбе́зно пребыва́етъ.
Вопро́съ: О богосло́віи коли́ко есте́ствъ исповѣ́дуеши?
Отвѣ́тъ: Еди́но естество́ исповѣ́дую.
Вопро́съ: Ко́е?
Отвѣ́тъ: Божество́.
Вопро́съ: Что́ е́сть Бо́гъ?
Отвѣ́тъ: Бо́гъ е́сть существо́ непови́нно и вина́ вся́ческимъ, си́рѣчь, всеси́ленъ, всемогíй, и вся́кія вины́ и естества́ преесте́ствененъ.
Вопро́съ: По чесому́ познава́ется Оте́цъ отъ Сы́на?
Отвѣ́тъ: По ѵпоста́сехъ, поне́же е́сть Оте́цъ нерожде́нъ.Вопро́съ: По чесому́ познава́ется Сы́нъ отъ Отца́? Отвѣ́тъ: По ѵпоста́сехъ, поне́же е́сть Сы́нъ рожде́нъ.
Вопро́съ: По чесому́ познава́ется Ду́хъ Святы́й отъ Отца́ и Сы́на?
Отвѣ́тъ: По ѵпоста́сехъ, поне́же е́сть исходя́щъ.
Вопро́съ: Ка́ко вѣ́руеши?
Отвѣ́тъ: Вѣ́рую во еди́наго Бо́га Отца́, и еди́наго ро́ждшагося отъ Него́ Бо́га Сы́на, и во еди́наго Ду́ха Свята́го, отъ Отца́ исходя́ща, Бо́га.
Вопро́съ: Что́ е́сть существо́?
Отвѣ́тъ: Существо́ е́сть ве́щь самобы́тна, не тре́буя ина́го къ своему́ составле́нію.
Вопро́съ: О Божествѣ́ коли́ко ѵпоста́сей исповѣ́дуеши?
Отвѣ́тъ: Три́ ѵпоста́си исповѣ́дую: Отца́ и Сы́на и Свята́го Ду́ха.
Вопро́съ: Что́ е́сть ѵпоста́сь?
Отвѣ́тъ: Лице́ единосу́щное, о́бразъ естества́ Отчаго; ли́ца же глаго́лемъ о Бо́зѣ, безпло́тна и не воображе́на.
Вопро́съ: Что́ е́сть осо́бно вся́кому отъ тре́хъ ѵпоста́сей, и что́ о́бще? Отвѣ́тъ: Осо́бно у́бо е́сть: Отцу́ — нерожде́ніе, Сы́ну же — рожде́ніе, а Ду́ху Свято́му — исхожде́ніе; о́бще же и́мъ Божество́ и ца́рство.
О Христѣ́.
Вопро́съ: О промышле́ніи воплоще́нія Христо́ва, коли́ко есте́ствъ исповѣ́дуеши? Отвѣ́тъ: Два́ естества́ исповѣ́дую: еди́но Божества́ и еди́но человѣ́чества.
Вопро́съ: Что́ е́сть во́ля Боже́ственая?
Отвѣ́тъ: Во́ля Боже́ственная е́сть, е́же очища́ти прокаже́нныя. Якоже показа́ти хотя́ Христо́съ во́лю и дѣ́йство Боже́ственое, рече́ прокаже́нному: хощу́, очи́стися.
Вопро́съ: Что́ е́сть дѣ́йство Бо́жіе?
Отвѣ́тъ: Дѣ́йство Бо́жіе е́сть: е́же спасти́ся всѣ́мъ человѣ́комъ, и на увѣ́деніе и́стины пріити́.
Вопро́съ: Что́ е́сть во́ля человѣ́ча?
Отвѣ́тъ: Во́ля человѣ́ча е́сть: е́же проси́ти да испіе́тъ, я́коже на крестѣ́.
Вопро́съ: Что́ е́сть дѣ́йство человѣ́ческое?
Отвѣ́тъ: Дѣ́йство человѣ́ческое е́сть: е́же путьше́ствовати, утруди́тися, и про́чая такова́я.
Вопро́съ: Коли́ко ѵпоста́сей о воплоще́ніи исповѣ́дуеши?
Отвѣ́тъ: Еди́ну ѵпоста́сь исповѣ́дую: я́ко То́й еди́нъ Сы́нъ Бо́жіи и Сы́нъ Дѣ́вы.
Вопро́съ: По чесому́ прича́стникъ е́сть Сы́нъ Отцу́ и Свято́му Ду́ху?
Отвѣ́тъ: Прича́стникъ Имъ е́сть по естеству́ Боже́ственному, поне́же е́сть соверше́нъ Бо́гъ.
Вопро́съ: По чесому́ прича́стникъ е́сть человѣ́комъ?
Отвѣ́тъ: По естеству́ вочеловѣ́ченія Своего́, поне́же и человѣ́къ соверше́нъ е́сть.
Вопро́съ: Чесо́ ра́ди Сы́нъ воплоти́ся, а не Оте́цъ или́ Ду́хъ?
Отвѣ́тъ: Яко да сохрани́тъ сво́йство ѵпоста́си Своея́, я́ко бы́ти Тому́ на небесѣ́хъ Сы́ну и на земли́ Сы́ну. Ами́нь.
