Канон за болящаго
Март 16th 2017 -
Тропарь, глас 6.
Поми́луй нас Го́споди, поми́луй нас, вся́каго бо отве́та недоуме́юще, сию́ Ти моли́тву, я́ко Влады́це, гре́шнии раби́ Твои́ прино́сим, поми́луй нас Го́споди, поми́луй нас.
Слава. Го́споди, поми́луй нас, на Тя бо упова́хом, не прогне́вайся на ны зело́, ниже́ помяни́ беззако́нии на́ших, но при́зри на ны, я́ко Милосе́рд, и изба́ви нас от враг на́ших, Ты бо еси́ Бог наш, и мы лю́дие Твои́, и вси де́ла руку́ Твое́ю, и и́мя Твое́ призыва́ем.
И ныне. Милосе́рдия две́ри отве́рзи нам, Благослове́нная Богоро́дице Де́во, наде́ющиися на Тя не поги́бнем, но да изба́вимся Тобо́ю от бед. Ты бо еси́ спасе́ние ро́ду христиа́нскому.
Канон, глас 3. Песнь 1, ирмос.
Пределя́ему мо́ре жезло́м дре́вле, Изра́иль про́йде я́ко по пусты́ни, я́ко Креста́ о́браз я́ве претворя́ше стезю́, сего́ ра́ди воспое́м во хвале́нии, чу́дному Бо́гу на́шему, я́ко просла́вися.
Запев. Ми́лостиве Го́споди, услы́ши моли́тву раб Свои́х, моля́щихся Тебе́ (поклон).
В день печа́ли, наше́дшия на ны, к Тебе́, Христе́ Спа́се, припа́дающе, Твоея́ ми́лости про́сим, облегчи́ боле́знь ра(бы́)ба́ Тво(ея́)его́, изорцы́ нам я́ко и со́тнику: иди́, се здрав есть о́трок твой.
Запев. Мольбы́ и моле́ния, с воздыха́нием к Тебе́ вопие́м, Сы́не Бо́жии, поми́луй нас, воздви́гни со одра́ лежа́щ(ую)аго, я́ко осла́бленнаго сло́вом: возьми́ одр свой, глаго́ля, отпуща́юттися греси́ твои́.
Слава. Твоего́ Христе́ о́браза подо́бию поклоня́ющеся (поклон), ве́рою целу́ем, и боля́щ(ей)ему здра́вия про́сим, подража́юще кровоточи́вей, я́же подо́лце риз Ти косну́ся, и исцеле́ние неду́га прия́т.
И ныне. Пречи́стая Госпоже́ Богоро́дице, всем изве́стная Помо́щница, не пре́зри нас, к Тебе́ припа́дающих, моли́ я́ко Блага́, Своего́ Сы́на и Бо́га на́шего, да́ти здра́вие боля́щ(ей)ему, да Тя с на́ми прославля́ет.
Катавасия. Сохрани́ от скорби, от боле́зни, от неду́га тя́жкаго раб(у́)а́ Сво(ю́)его́ (имя рек) боля́щ(ую)аго Ми́лостиве, я́ко усе́рдно к Тебе́ прибега́ем, к Ми́лостивому Изба́вителю и всех Влады́це, Го́споду Ису́су (поклон).
Го́споди поми́луй (трижды, с поклонами).
Песнь 3, ирмос.
И́же от не су́щих вся приведы́и, Сло́вом созида́ема, соверша́ема же Ду́хом, Вседержи́телю Вы́шнии, в любви́ Свое́й утверди́ мене́.
Запев. И́же от тя́жких боле́зней на земли́ пове́рже(на)н, к Тебе́ Христе́, с на́ми вопие́т, пода́ждь здра́вие телеси́ (ея́) его́, я́ко же Иезеки́и плака́вшуся к Тебе́.
Запев. При́зри Го́споди, на на́ше смире́ние и не помяни́ беззако́нии на́ших, но ве́ры ра́ди боля́щ(ия)аго, я́ко прокаже́ннаго, сло́вом исцели́ (ей)ему́ боле́знь, да Твое́, Христе́ Бо́же, сла́вится и́мя.
Слава. Це́рковь ю́же еси́ освяти́л, на ту Христе́ не даждь поно́са, но воздви́гни неви́димо в неду́зе на одре́ лежа́щ(ую)аго, в не́йжетися мо́лят; да не реку́т неве́рнии: где есть Бог их?
И ныне. К Твоему́ Пречи́стому Богоро́дице, о́бразу ру́це возде́юще, вопие́м: услы́ши раб Твои́х моли́тву и спаси́ в боле́зни лежа́щ(ую)аго, да от боле́зни воста́в(ши), возда́ст обе́ты, я́же в печа́ли глаго́лаша уста́ (ея́) его́. Катавасия.
Седален, глас 8.
На одре́ грехо́внем лежа́щ(у)а мя, и страстьми́ уя́зве(ну)на, и я́коже воздви́же Петро́ву те́щу, и спасе́ разсла́бленаго носи́ма со одро́м; та́ко и ны́не посети́ Ми́лостиве, боля́щ(ую)аго, понесы́и неду́ги ро́да на́шего, Тебе́ еди́наго све́мы, терпели́ва и ми́лосердца, ми́лостива Врача́ душа́м и те́лом, Христа́ Бо́га на́шего, наводя́ща неду́ги, и па́ки исцеля́юща, подава́юща проще́ние ка́ющимся о согреше́ниих, еди́наго Милосе́рдаго и Ми́лостиваго.
Слава. Аз гре́шн(ая)ыи пла́чуся, на одре́ свое́м слежа́(щи), просты́ню ми пода́ждь, Христе́ Бо́же, и от боле́зни сея́ воздви́гни мя; я́же есмь от ю́ности грехи́ сотвори́л(а), избы́ти ми моли́твами Богоро́дицы сих да́руй.
И ныне. Умилосе́рдися и спаси́ мя, воздви́гни мя от одра́ боле́зненнаго, мощь бо моя́ во мне изнемо́же, и весь(вся) неча́янием одержи́(ма)мь есмь, Ма́ти Бо́жия Пречи́стая, исцели́ неду́гующ(у)а лю́те, Ты бо еси́ Помо́щница христия́ном.
Песнь 4, ирмос.
Положи́ к нам тве́рдую любо́вь Си Го́споди, единоро́днаго бо Ти Сы́на, нас ра́ди на́ смерть вдал еси́, те́мже Ти вопие́м, восхваля́юще: сла́ва си́ле Твое́й.
Запев. У́же отча́янн(у)а лю́тым неду́гом, и к сме́рти прибли́живш(уся)ася, возврати́, Христе́ на живо́т и даждь пла́чущимся уте́ху, да вси прославля́ем Твоя́ свята́я чудеса́.
Запев. К Тебе́ Тво́рче, ка́емся свои́х грех, я́ко не хо́щеши сме́рти гре́шничи; оживи́, уздра́ви боля́щ(ую)аго, да воста́в(ши) послу́жит Ти, испове́дая с на́ми Твою́ бла́гость.
Слава. Сле́зы Манаси́ины, ниневи́тян покая́ние, Давы́дово испове́дание прии́м, вско́ре спасл еси́; и на́ша моли́твы ны́не приими́, даждь здра́вие боля́щ(ей)ему, о не(й)м же Тя мо́лим.
И ныне. Пода́ждь нам Твою́ ми́лость, Госпоже́, всегда на Тя наде́ющимся, испроси́ здра́вие боля́щ(ей)ему, враче́внеи Твои́ ру́це с Предоте́чею Богоро́дице, ко́ Господу простира́ющи. Катавасия.
Песнь 5, ирмос.
На земли́ Неви́димыи яви́ся, и с земны́ми во́лею поживе́ Непости́жимыи; и к Тебе́ у́треннююще, воспева́ем Тя, Человеколю́бче.
Запев. Дщерь Иаи́рову у́же уме́ршу, я́ко Бог оживи́л еси́; и ны́не возведи́, Христе́ Бо́же, от врат сме́ртных боля́щ(ую)аго, Ты бо еси́ путь и живо́т всем.
Запев. Сы́на вдови́ча оживи́в Спа́се, и тоя́ сле́зы преложи́в на ра́дость; спаси́ от неду́га тле́ющ(ую)аго ра(бу́)ба́ Си, да и на́ша скорбь и боле́знь на ра́дость пре́йдет.
Слава. О́гненную боле́знь те́щи Петро́ве прикоснове́нием Твои́м исцели́в; ны́не воста́ви боля́щ(ую)аго ра(бу́)ба́ Ти, да воста́в(ши), я́ко и она́, послу́жит Ти.
И ныне. Ско́рбнии, смире́нии, гре́шнии, не иму́щии дерзнове́ния, к Тебе́, Пречи́стая Богома́ти, вопие́м: умоли́ Сы́на Своего́ Христа́, да́ти боля́щ(ей)ему здра́вие телеси́. Катавасия.
Песнь 6, ирмос.
Бе́здна после́дняя грехо́в обы́де мя, и исчеза́ет дух мой, но просте́р Влады́ко высо́кую Си мы́шцу, я́ко Петра́ мя, Упра́вителю спаси́.
Запев. Бе́здну милосе́рдия и ми́лости име́я, Христе́ Бо́же, внуши́ моле́ния раб Твои́х, Ты бо еси́ Петро́м Тави́фу воскреси́в; Ты и ны́не в боле́зни лежа́щ(ую)аго воздви́гни, послу́шав церко́вных моли́твенник.
Запев. Врачу́ душа́м и те́лом на́шим, понесы́и неду́ги всего́ ми́ра Христе́, и Ене́я Па́влом исцели́выи; Ты и ны́не боля́щ(ую)аго исцели́, святы́х апо́стол моли́твами.
Слава. Преложи́ Христе́, на ра́дость рыда́ние, о неду́жн(ей)ем скорбя́щ(ей)ем, да Твою́ получи́вше ми́лость, вни́дут в дом Твой, со обе́тными дарми́, сла́вяще Тя в Тро́ице Еди́наго Бо́га.
И ныне. Прииди́те О! дру́зи, поклони́мся (поклон), моля́щеся о боля́щ(ей)ем, Божи́и Ма́тери; Та бо имее́т власть неду́жныя исцеля́ти со безме́здникома вку́пе, духо́вным неви́димо пома́зающи ма́слом. Катавасия.
Слава, и ныне. Кондак, глас 3.
Ду́шу мою́ Го́споди, во гресе́х вся́ческих, безме́стными дея́ньми лю́те разсла́бленну, воздви́гни боже́ственным Си человеколю́бием, я́коже и разсла́бленнаго воздви́гнул еси́ дре́вле; я́ко да зову́ Ти спаса́ем, Щедрый: даждь ми Христе́, исцеле́ние.
Песнь 7, ирмос.
Пе́рвее те́лу злато́му, пе́рсскою че́стию де́ти не поклони́шася, трие́ пою́ще посреде́ пе́щи огня́: отце́м Бо́г благослове́н еси́.
Запев Кресту. О! Кре́сте пресвяты́й Христо́в, честно́е дре́во живо́тное, тобо́ю смерть поги́бе, и ме́ртвни воскресо́ша, и ны́не боля́щ(ую)аго исцели́ и оживи́, я́коже при Еле́не уме́ршую деви́цу.
Запев. До́лгую и лю́тую боле́знь И́овлю на гно́ищи и в че́рвех, того́ моля́щася сло́вом исцели́л еси́, Го́спо¬ди; ны́не же в це́ркви о боля́щ(ей)ем моли́м Тя: я́ко Благ, исцели́ неви́димо моли́твами святы́х Твои́х.
Слава. Вси све́мы я́ко у́мрети нам есть, Тебе́ Бо́гу, та́ко изво́льшу; но на ма́ло вре́мя Ми́лостиве, здра́вия про́сим боля́щ(ей)ему, премени́ от сме́рти на живо́т, даждь скорбя́щим уте́ху.
И ныне. Посо́бствуй и помога́й на́шему сиро́тству Богоро́дице, Ты бо ве́си вре́мя и час, когда́ умоли́ти Сы́на Своего́ и Бо́га на́шего, да́ти боля́щ(ей)ему здра́вие и проще́ние от всех грех. Катавасия.
Песнь 8, ирмос.
Служи́ти жи́ву Бо́гу, и́же в Вавило́не де́ти прете́рпеша, о мусики́йских орга́нех неради́ша, и в пла́мени посреде́ стоя́ще, богоуго́дную песнь поя́ху: благослови́те вся де́ла Госпо́дня Го́спода.
Запев. Кажа́ покажи́ Влады́ко, боле́знию ра(бу́)ба́ Тво(ю́)его́, и ско́ро исцели́, Ми́лостиве Христе́ Бо́же, и еще́ сме́рти не преда́ждь су́дней, да Ти покая́ние возда́ст; Сам бо рекл еси́: не хощу́ сме́рти гре́шничи.
Запев. Го́споди Ми́лостиве, Твоя́ пресла́вная чудеса́, да и до нас ны́не дости́гнут; бе́сы прожени́, неду́ги погуби́, ра́ны исцели́, боле́зни уврачу́й, и потво́ры и чародея́ния, и вся́коя я́зи изба́ви ны.
Слава. Запрети́выи Христе́ морьски́м ве́тром, и страх учени́к на ра́дость преложи́; запрети́ и ны́не тя́жким боле́знем, тружа́ющим ра(бу́)ба́ Тво(ю́)его́, да вси возвесели́мся, хва́ляще Тя во́ веки.
И ныне. Изба́ви Богоро́дице, от обыше́дших ны печа́лей, бед же и скорбе́й, и всех разли́чных неду́г, отра́вы же и чароде́йства, и бесо́вскаго мечта́ния, и от уро́ка злых челове́к, и напра́сныя сме́рти, молимся. Катавасия.
Песнь 9, ирмос.
На Сина́стей горе́ ви́де Тя в купине́ Моисе́й неопа́льну, огнь Боже́ственныи заче́ншу во́ чреве; Дании́л же Тя ви́де, го́ру непресе́чену; жезл прозя́бшии, Иса́ия взыва́ше, от ко́рене Давы́дова.
Запев (поклон). Исто́чниче жи́зни, пода́телю Христе́ ми́лости, не отврати́ лица́ Твоего́ от нас, облегчи́ боле́знь утруже́н(ой)ому боле́знию, и воздви́гни я́ко Фадде́ом А́вгаря, да при́сно Тебе́ сла́вит, со Отце́м и Святы́м Ду́хом.
Запев. Ева́нгельскому ве́рующе гла́су, Твоего́ и́щем обе́та Христе́, проси́те бо рече́, и да́стся вам; тем ны́не предстоя́ще мо́лим Тя: воста́ви со одра́ здра́в(у)а, лю́тым пове́ржен(у)а неду́гом, да Тя с на́ми вку́пе велича́ет.
Слава. Му́чим(ая)ыи неду́гом, внутрь неви́димыми ра́нами, Тебе́ Христе́, с на́ми вопие́т; не нам Го́споди, ни нас ра́ди, вси бо есмы́ испо́лнени грехо́в, но Ма́терними Ти и Предоте́чевыми моли́твами даждь исцеле́ние боля́щ(ей)ему, да Тя вси возвели́чим.
И ныне. Бо́жия Ма́ти Пречи́стая, со все́ми святы́ми призыва́ем Тя, со а́нгелы и арха́нгелы, с проро́ки и патриа́рхи, со апо́столы и святи́тели, с преподо́бными и пра́ведными, моли́тися Христу́ Бо́гу на́шему да́ти здра́вие боля́щ(ей)ему, да Тя вси велича́ем. Катавасия.
Достойно есть (поклон земной). Трисвятое и по Отче наш. Молитва Исусова. Аминь. Тропари: Помилуй нас, Господи; и: Господи, помилуй нас. Слава, кондак: Душу мою, Господи. И ныне, богородичен: Милосердия двери. Господи помилуй (40). Слава, и ныне.
Запев: Ми́лостиве Го́споди, услы́ши моли́тву раб Свои́х, моля́щихся Тебе́ (поклон).
Молитва. Бо́же си́льныи, ми́лостию стро́яи вся, на спасе́ние ро́ду челове́ческому, посети́ ра(бу́)ба́ Сво(ю́)его́ (сию́)сего́ (и́мя рек), нарица́ю(щу)ща и́мя Христа́ Твоего́, исцели́(ю́) его́ от вся́каго неду́га плотьска́го и душе́внаго, и отпусти́ грех, и грехо́вныя собла́зны, и вся́ку напа́сть, и вся́кое наше́ствие неприя́зненно, дале́че сотвори́ от ра(бы́)ба́ Тво(ея́)его́, и воздви́гни от одра́ грехо́внаго, и устро́й (ю́)его́ во святу́ю Твою́ це́рковь, здра́в(у)а душе́ю и те́лом, и де́лы до́брыми сла́вящ(у)аго со все́ми людьми́ и́мя Христа́ Твоего́, я́ко Тебе́ сла́ву возсыла́ем, со безнача́льным Ти Сы́ном и со Святы́м Ду́хом, ны́не и при́сно и во́ веки веко́м, ами́нь (поклон земной).
Честнейшую херувим. Слава, и ныне. Господи помилуй (дважды), Господи благослови (с поклонами).
Отпу́ст. Го́споди Ису́се Христе́ Сы́не Бо́жии, моли́тв ра́ди Пречи́стыя Ти Ма́тери, си́лою честна́го и животворя́щаго Креста́, заступле́нием честны́х небе́сных сил безпло́тных, честна́го и сла́внаго проро́ка и Предоте́чи Крести́теля Иоа́нна, святы́х сла́вных и всехва́льных апо́стол, святы́х добропобе́дных му́ченик, преподо́бных и богоно́сных оте́ц на́ших, святы́х чудотво́рец и безсре́бреник Козьмы́ и Дамиа́на, Ки́ра и Иоа́нна, и всех ра́ди святы́х, поми́луй и спаси́ боля́щ(ую)аго ра(бу́)ба́ Сво(ю́)его́ (и́мя рек), я́ко Благ и Человеколю́бец. Ами́нь.
Го́споди помилуй (трижды), и обычные исходные поклоны.
Метки: Канон
