Панихида
Сентябрь 22nd 2015 -
Возглас священника.
Великая ектения.
Господи, помилуй. (На каждое возглашение священника).
Священник: Подай, Господи.
Хор: Господи, помилуй.
Глас 8-й
Аллилуия (трижды).
Тропарь, глас 8-й
Глубиною мудрости человеколюбно вся строяй,/ и полезное всем подаваяй, едине Содетелю, упокой, Господи, души раб Твоих,/ на Тя бо упование возложиша,/ Творца и Зиждителя и Бога нашего. (Дважды)
Слава, и ныне..., Богородичен:
Тебе и стену, и пристанище имамы,/ и молитвенницу благоприятну к Богу,/ Егоже родила еси, Богородице безневестная, верных спасение.
Тропари, глас 5-й
Благословен еси, Господи,/ научи мя оправданием Твоим.
— Святых лик обрете источник жизни, и дверь райскую,/ да обрящу и аз путь покаянием./ Погибшее овча аз есмь, // воззови мя, Спасе, и спаси мя.
Благословен ...
— Агнца Божия проповедавше, / и заклани бывше якоже агнцы, / и к жизни нестареемей, святии, / и присносущней преставльшеся. / Того прилежно, мученицы, молите // долгов разрешение нам даровати
Благословен ...
— В путь узкий хождшии прискорбный, / вси в житии крест яко ярем вземшии, / и Мне последовавшия верою, / приидите насладитеся, / ихже уготовах вам почестей, // и венцев небесных.
Благословен ...
— Образ есмь неизреченныя Твоея славы, / аще и язвы ношу прегрешений; / ущедри Твое создание, Владыко, / и очисти Твоим благоутробием, / и вожделенное отечество подаждь ми, // рая паки жителя мя сотворяя.
Благословен ...
— Древле убо от не сущих создавый мя, / и образом Твоим Божественным почтый, / преступлением же заповеди / паки мя возвративый в землю, от неяже взят бых; / на еже по подобию возведи // древнею добротою возобразитися.
Благословен ...
— Упокой, Боже, рабы Твоя/ и учини я в раи, / идеже лицы святых, Господи, / и праведницы сияют яко светила; / усопшия рабы Твоя упокой, // презирая их вся согрешения.
Слава:
— Трисиятельное Единаго Божества благочестно поем, вопиюще: / Свят еси, Отче Безначальный, / Собезначальный Сыне, и Божественный Душе, / просвети нас верою Тебе служащих, // и вечнаго огня исхити.
И ныне:
— Богородичен: Радуйся, Чистая, Бога плотию рождшая во спасение всех, / Еюже род человеческий обрете спасение, / Тобою да обрящем рай, // Богородице чистая благословенная.
Аллилуия, аллилуия, аллилуия, / Слава Тебе, Боже. (Трижды)
Седален, глас 5-й
Покой, Спасе наш, с праведными рабы Твоя, / и сия всели во дворы Твоя, / якоже есть писано, / презирая, яко благ, прегрешения их, / вольная и невольная, / / и вся яже в ведении, и не в ведении, Человеколюбче.
Богородичен: От Девы возсиявый миру, Христе Боже, // сыны света Тою показавый, помилуй нас.
Канон, глас 6
Песнь 1
Ирмос: Яко по суху пешешествовав Израиль, / по бездне стопами, / гонителя фараона / видя потопляема, / Богу победную песнь // поим, вопияше.
Запевы:
Покой, Господи, / души усопших раб Твоих.
Слава Отцу и Сыну, / и Святому Духу.
И ныне и присно, // и во веки веков, аминь.
Песнь 3
Ирмос: Несть свят, / якоже Ты, Господи Боже мой, / вознесый рог верных Твоих, Блаже, / и утвердивый нас на камени // исповедания Твоего.
Запевы: Покой, Господи...
Песнь 4
Ирмос: Христос моя сила, / Бог и Господь, честная Церковь / боголепно поет, взывающи // от смысла чиста, о Господе празднующи.
Запевы: Покой, Господи...
Песнь 5
Ирмос: Божиим / светом Твоим, Блаже, / утренюющих Ти души / любовию озари, молюся, / Тя ведети, Слове Божий, / истиннаго Бога, // от мрака греховнаго взывающа.
Запевы: Покой, Господи...
Песнь 6
Ирмос: Житейское море, / воздвизаемое зря напастей бурею, / к тихому пристанищу Твоему притек, вопию Ти: / возведи от тли живот мой, // Многомилостиве.
Малая заупокойная ектения
Господи, помилуй. Подай, Господи. Господи, помилуй. Аминь.
Кондак, глас 8
Со святыми упокой, / Христе, души раб Твоих, / идеже несть болезнь, ни печаль, / ни воздыхание, // но жизнь безконечная.
Икос: Сам един еси безсмертный, / сотворивый и создавый человека: / земнии убо от земли создахомся, / и в землю туюжде пойдем, / якоже повелел еси, создавый мя и рекий ми: / яко земля еси, и в землю отыдеши: / аможе вси человецы пойдем, / надгробное рыдание, творяще песнь: // аллилуия.
Песнь 7
Ирмос: Росодательну убо пещь / содела Ангел / преподобным отроком, / халдеи же опаляющее / веление Божие, мучителя увеща вопити: // благословен еси, Боже отец наших.
Запевы: Покой, Господи...
Песнь 8
Ирмос: Из пламене преподобным росу источил еси / и праведнаго жертву водою попалил еси: / вся бо твориши, Христе, токмо еже хотети. // Тя превозносим во вся веки.
Запевы: Покой, Господи...
Иерей: Богородицу и Матерь Света в песнех возвеличим.
Хор: Дуси и души праведных восхвалят Тя, Господи.
Песнь 9
Ирмос: Бога / человеком невозможно видети, / на Негоже не смеют чини Ангельстии взирати; / Тобою же, Всечистая, явися человеком / Слово Воплощенно,/ Егоже величающе, / с небесными вои Тя ублажаем.
Тропари, глас 4
Со духи праведных скончавшихся, / души раб Твоих, Спасе, упокой, / сохраняя их во блаженной жизни, яже у Тебе, Человеколюбче.
В покоищи Твоем, Господи, / идеже вси святии Твои упокоеваются, / упокой и души раб Твоих, яко Един еси Человеколюбец.
Слава: Ты еси Бог сошедый во ад, и узы окованных разрешивый, / Сам и души раб Твоих упокой.
И ныне: Едина чистая и непорочная Дево, Бога без семене рождшая, / моли спастися душам их.
Диакон: Помилуй нас, Боже...
Хор: Господи, помилуй. Трижды.
Иерей: Премудрость! Пресвятая Богородице...
Хор: Честнейшую Херувим / и славнейшую без сравнения Серафим, /
без истления Бога Слова рождшую, / сущую Богородицу, Тя величаем.
Диакон: Во блаженном успении вечный покой подаждь, Господи, усопшим рабом
Твоим [имярек], и сотвори им вечную память.
Хор: Вечная память,... (трижды). Души их во благих водворятся,и память их в род и род.
Источник: .hamburg-hram.de
