Молитва святому Архидиакону Лаврентию
Июнь 10th 2011 -
Молитва святому Архидиакону Лаврентию
О пресвятый и предивный стратотерпче Христов, архидиаконе Лаврентие! Восхваляюще веру и страдания твоя, почитаем победу и венценосное прохождение твое чрез горящее углие от тьмы века сего ко свету невечернему престола величествия Божия. Темже убо молим тя: якоже древле притекавшия с верою к покрову твоему чудесы твоими утвердил еси, тако да приимеши и нас под покров твой, и в болезни и печалех наших заступник нам да будеши; и якоже от слепоты телесных очес Крискентиана преложением рук исцелил еси, тако да исцелиши предстательством твоим у престола Божия и нашу душевную слепоту.
Призри на разслабление наше телесное и душевное, и укрепи нас бодренностию противу враг наших видимых и невидимых, удручающих нас напастьми, да твоею помощию путь маловременныя жизни сея прешедше, непобеждени от бед и скорбей и всякаго лютаго обстояния, достигнем неприступныя славы величествия Божия, идеже предстоя, молишися со дерзновением за люди, прибегающия с верою к тебе и воспевающия дивнаго во святых Бога Израилева во веки веков. Аминь.
Тропарь, глас 8
Серафим во плоти явился еси Лаврентие, огнем бо Божественныя любве распаляем, ярящийся огнь мучителя ни во что же вменил еси и угасил еси того ревность безбожную, темже и венец победоносен о имени и страдании твоем от Христа приял еси мужественно, сего ради победительно взываем тебе: Радуйся, мучениче непобедимый Лаврентие.
Кондак, глас 2
Огнем бежественным распалив сердце твое, огнь страстей до конца испепелил еси, страдальцев утверждение, богоносе мучениче Лаврентие, и в страданиих вопиял еси верно: ничтоже мя разлучит любве Христовы.
Тропарь, глас 4-й:
Мученик Твой, Господи, Лаврентий, во страдании своем венец прият нетленный от Тебе, Бога нашего: имеяй бо крепость Твою, мучителей низложи, сокруши и демонов немощныя дерзости, Того молитвами спаси души наша.
Кондак, глас 4-й:
Огнем Божественным распалив сердце твое, огнь страстей до конца испепелил еси, страдальцев утверждение, богоносне мучениче Лаврентие, и в страданиих вопиял еси верно: ничтоже мя разлучит любве Христовы.
По благословению Архиепископа Херсонского и Таврического Иоанна В память 1750-летия мученической кончины св. мч. архидиакона Лаврентия Источник: «Акафист святому архидиакону Лаврентию». Херсон 2008.
