Молитва преподобному Алексею Голосеевскому
Март 22nd 2018 -
Тропарь, глас 1:
Ангеле земный и человече небесный, во обителех Киевских потрудивыйся, в пустынь Голосеевскую вселился еси, старче Алексие, преподобне отче наш; пощением, молитвами и благодатию Божественною просветися, духовная твоя чада к жизни вечней настави, и ныне, имея дерзновение ко Святей Троице, недуги различныя врачуеши с верою притекающих к раце мощей твоих, даруя мир и спасение душам нашим.
Кондак, глас 4:
Безплотных сопричастниче и Преподобным Печерским сообщниче, всеславне старче Алексие, смиренномудрие имевый, душею и сердцем кроток был еси, во плоти на земли первее молча, послежде чудом Божиим глагола, дар прозорливости от Господа приявый, словесы и деяньми научал еси приходящия к тебе, ныне же предстояй Престолу Божию, молися о всех нас.
Молитва
Господи, Иисусе Христе, Боже наш, послужити спасению рода человеческаго изволивый, страшныя Страсти претерпевый, и даже до Креста и погребения снизшедый; Воскресением же тридневным естество человеческое обновивый! Обнови светом Твоим умы и сердца младенцев и отроков (имена), невинно страждущих от недуга аутизма, благослови их, укрепи, утверди и умудри их благодатию Твоею.
Служащих ближним нарекий Твоими служителями, Господи, благослови добродетелию терпения родителей, служащих сим чадам, мудростию Евангелия украси их, раздражительность и пагубу гнева укроти, зависти зачатки искорени, подаждь радость духовную и доверие всецелое благой воле Твоей, Боже!
Верою припадаем Ти, Блаже, и приносим молитвы угодника Твоего, преподобнаго и богоноснаго отца нашего Алексия Голосеевскаго; на нем бо Промысл Твой дивный явися, яко благодатию отверзошася уста его, недугом прежде скованныя, и проповеда он радость Воскресения Твоего.
Темже, уповающе на Твое благосердие и милость неизреченную, разумеюще глубину любве Твоея и премудрости тайну, благодарение и славу Тебе возсылаем, со Отцем и Святым Твоим Духом во веки веков. Аминь.
