Молитва иконе Пресвятой Богородицы Страстная
Декабрь 18th 2014 -
Тропарь, глас 4
Днесь возсия неизреченно / царствующему граду нашему Москве икона Богоматере, / и, яко светозарным солнцем, / пришествием тоя озарися весь мир, / Небесныя силы и души праведных мысленно торжествуют, радующеся, / мы же, на ню взирающе, / к Богородице со слезами вопием: / о Всемилостивая Госпоже, Владычице Богородице, / молися из Тебе воплощенному Христу, Богу нашему, / да подаст мир и здравие всем Христианом // по велицей и неизреченней Своей милости.
Ин тропарь, глас 8
Днесь величает радостно Спасителя Липецк град, / яко свет солнечный восприемше чудотворную Твою икону, Владычице Богородице, / и с любовию славит Тя Матерь Божию, / и милости и цельбы Твоя на нас излиянныя, /яко повелела еси обнести образ Твой Страстный вокруг града нашего, / да очистится святынею Твоею воздух от холеры смертоносныя / и да возблагодарят вси людие неизреченную любовь // Святой и Нераздельной и Живоначальной Троицы.
Кондак, глас 3-й
Благодать прияхом нетления, / еже даровала еси нам, спасительнаго Твоего целения / чудотворным Твоим образом честным, Богородице Дево,/ темже вопием Ти и с радостию зовем: / Госпоже Царице, / молимтися умильно, грешнии, со слезами, глаголюще: / о Пресвятая Владычице, / скорое нам яви заступление и помощь, / спаси ны от супостат наших, и от всякия скорби соблюди, / землю нашу миром огради, и вся люди Твоя покрый, / и соблюди на Тя уповающия, / потщися избавити, да не погибнем зле, раби Твои, / но да зовем Ти: // радуйся, Невесто Неневестная.
Молитва Пресвятой Богородице пред иконой Ея Липецкой «Страстной»
О, Преблагословенная и Препрославленная Дево Богородице, Владычице! Услыши нас недостойных и грехми обремененных взирающих на чудотворный страстной Твой Крест и орудия страданий Господа Нашего Сладчайшего Иисуса Христа и взывающих к Тебе:
О, Всеблагая Предстательнице и Ходатаице наша пред Богом и единая Помощнице и Надеждо наша в жизни сей и по смерти, не отрини нас за грехопадения наша, но приими молитву нашу в теплоте сердца Тебе возносимую. Заступи нас от всех врагов видимых и невидимых и подаждь нам мысль благую в час недоумения и гонения. Паки же пошли в жизни сей тишину, мир и здравие, испроси нам у Господа нашего Иисуса Христа веру крепкую и несумненную, надежду и любовь, более же всего благодать Святаго Духа, да прославим Имя Его Святое и, укрепив сердца наша, неленостно течем по пути заповедей Его. И да не отпадем в дни гонения и посмеяния веры. Огради нас, Владычице, от всяких жизненных соблазнов и умоли Господа избавити нас от всякаго смущения, неверия, сомнения, малодушия и окамененнаго нечувствия. Научи нас, Госпоже, како Тебе молитися и како делать дела угодные Богу.
О, Надеждо и веселие наше, Царице наша преблагая, подкрепи духовно нас немощных и грешных в жизни сей и в час кончины нашея предстани нам и уготованных ради грехов наших избави мучений. Да всегда воспоем величие Твое, сподобимся вечнаго небеснаго царствия, идеже по милости Божией будем непрестанно славити и величати Пречестное и Великолепое имя Отца, и Сына и Святаго Духа во веки веков. Аминь.
Метки: Богородица
