Канон Преподобному отцу нашему Дионисию, Архимандриту Сергиевы Лавры, Радонежскому чудотворцу
Май 25th 2012 -
Тропарь, глас 3
Земная прельщающая очеса миролюбцев возненавидел еси, отче богоносне Дионисие! За уметы та вменив, шествуя путем скорбным, в терпении добр воин Христов явился еси, победив страсти мира, был до кончины непоколебимый благочестия поборник. Темже мы днесь совершая священную память твою, духовными тя песньми ублажаем, и смиренно молим, да предстоя престолу Господа Бога ходатайствуеши о спасении душ наших.
Слава, и ныне, богородичен:
Вся единым соделав словом, восхотев мертвых сооживити Богови, и тление облещи в нетление,
и вознести на небо, во утробу неискособрачныя Девы вселился еси, юже величающе благословим тя.
Глас 6. Песнь 1. Ирмос:
Яко по суху пешешествовав Израиль, по бездне стопами, гонителями фараона, видя потопляема, Богу победную песнь поим, вопише.
От младых ногтей, богоносне Дионисие, кротость велию возимел еси: детская глумления презрев, смиренномудрие сердечно явил, усердно страху Божию внимая.
Якоже Симеон духом провидя, прияв на руки предвечнаго младенца предрекл спасение человеком: такожде внутреннима очима прозрев отец твой духовный, быти имеющее твое житие, глаголаше: сей сын наш будет нам отец.
И козногласованиям и иным языком поучашеся, якоже обычай есть детем именитых, мирская внимающих: но страх Божий всадил еси в сердце твоем, ведящи, яко телесное обучение вмале полезно, а благочестие на все полезно есть.
Слава:
Яко от чрева матери твоея утвердися сердце твое во Господе, и из млада пример добродетели показл еси, тем тя благочестно восхваляя величаем
даровавшего ти душевный разум и просветившаго тя светом истины, Христа жизнодавца.
Богородичен:
Достойно есть блажити тя пренепорочную и честнейшую херувим: яко чрез ты соделася спасение миру, и свет благодати облиста седящих во тьме смертней.
Песнь 3.
Ирмос:
Несть свят якоже ты Господи Боже мой, вознесый рог верных твоих блажен, и утвердивый нас на камени исповедания твоего.
Причастен соделавшись браку, искушение приял еси от Бога, лишением другини твоея, якоже Иов: но сластем мира сего не поработил себе, и плотская желания победив, явился доволен быти к несению бремени евангелскаго, еже тебе бысть легко и благо.
Воистину ти благо бысть, яко да не преткнеши ногу твою о камень соблазнов мира сего, прияв щит веры, облеклся в шлем спасения, и возложив на ся броню правды, сопричел себе лику подвижников духовных.
Да красуется град Старица не дивными, и восхищающими зрение очес вещьми, но зрев юнаго старца Дионисия.
Слава:
Не бывает светильник под спудом, но на свещнице поставляют его, да всеми видим будет: такожде и ты отче Дионисие, благоугоден быв Богови получил посещение во избранных его, соделавшись наставником и назидателем стада духовнаго.
Богородичен:
Не истощима есть сила Божия чудодейтсвующая: прославляет Бог святых своих, да поздные потомки не прилепляясь к тленным и скорогибнущым вещам, паче всего пекутся о своем преселении на небо. Темже и дарова на сем пути светильники уже вознесшиеся, в нихже светит нам и Дионисий святый.
Седален:
Приидите к сему гробу глаголющиеся быти мудры и объюродевшие ослепившись помышлениями века сего: зрите чудо евангелиа, яко мы с мертвым глаголем, и той нам отвещавает: отче Дионисие рцы нам слово утешения: не услышите красозлоглагольствующие мудрецы века сего словес праведнаго: но правовернии приникнув к его гробу, к святым его остаткам явственне слышат. яко смерть верных суть пасха, и тленное их соделывается нетленным.
Слава, и ныне, богородичен:
Тобою дево чистая приемлем радость: родила бо всех освящающаго Христа и Бога нашего. тем же тя, яко Матерь зиждителя спасения человеков, проповедуем.
Песнь 4. ирмос:
Христос моя сила Бог и Господь, честная церковь, боголепно поет взывающи, от смысла чиста, о Господе празднующи.
Удивил еси Господи пути твоя в путех праведных, просвещая нас чрез возлюбленных твоих, и соделовая нам в них спасение, еже явил и во угоднике твоем Дионисии.
Внутренними смятениями егда напаствуема бе Россия, такожде и внешними, воздвигл еси Господи подвигоположников духовных, иже без меча и стрел, и не коварством укротиша дерзость врагов, но силою смирения и святости, в лице коих воспеваем и тя, отче Дионисие.
Ни ярость зверская, ни мучения злонырливых врагов не устрашиша тебе: но исповедник быв Божия слова увещая народ, и царю и патриарху, бдительному отечества пастырю многу сотворил еси пользу.
Слава:
О удивляяся вернии Россиане всеблаженному патриарху Гермогену, почтите днесь память воспеваемаго нами Дионисия, иже с ним вкупе поборствуя о вере, яко надежде спасения отечества, многия подъял озлобления.
Богородичен:
Аще зрящии токмо образ царя на земли суща благодетельна и благочестива, на перси свои восхитительне его взимают, яко изобразующа Христа Господа: возвеличим убо православнии носившую во утробе своей Царя царей, благодетеля всему миру, еяже молитвами при искреннем взывании нашем Бог мира Отец вознесет Благовернаго ИМПЕРАТОРА Нашего.
Песнь 5. Ирмос:
Божиим светом твоим блаже, утренюющих ти душы любовию озари, молюся, тя ведети словев Божий, истиннаго Бога, от мрака греховнаго взывающа.
Истинным слова Божия разумением одарен был еси свыше, богомудре Дионисие: и сего ради паче других поручено тебе исправити погрешности, в церковныя книги по неведению вшедшыя.
Подражая блаженному Максиму греку, иже быв истребован исправити преведенныя книги: но от
невежествующих пострада за истину: и ты святый Дионисей, быв ему последователь, сей же жребий имев, истину отщепившымся показуеши.
Слава:
Аще бы имели дар таковаго ведения, якоже славимый ныне Дионисий, согласие водворилося бы в нас: но о пресвятый Боже! веруем, яко и сих неведущих писания, приведеши во двор твой молитвами и примером богомудраго Дионисия.
Богородичен:
Твоя песнословцы богородице, духовно утвердишеся, исполнятся духа, не устами, но сердцем исповедающе тя быти честнейшую херувим, и благословеннейшую в человецех.
Песнь 6. ирмос:
Житейское море воздвизаемое зря напастей бурею, к тихому пристанищу твоему притек вопию ти: возведи от тли живот мой многомилостиве.
Кто исповесть благонравие и щедрость твою, отче Дионисие; никто бо не исхождаше тощ, от тебе не прияв милости и слов назидающих истинное богатство.
Яко желает елень на источники водныя, сице нозе твои течаху на песнословия Божия: колена твоя изнемогоста от бдения, и плоть твоя изменися от пощения, но немощь твоя прейде от силы в силу.
Искони враг человеков узре тя в мире сем, не от мира быти, поскрежета зубы своими, и рече, гнав постигну, но ты открыв путь твой ко Господу глаголал: аще и сонм врагов обидет мя, не убоюся, уповая на тя Боже отец наших, иже благословен во век.
Слава:
Якоже иногда три отроцы славляху среди огня ведомаго Бога: такожде и ты горя во огне озлоблений, огнем Божественныя любви попалил лукавнующих, воспевая милость в роды родов боящымся Господа.
Богородичен:
Змий уязвивый пяту благословеннаго притупил свое жало: темже убо тебе рождую стершаго главу его, умершаго за грехи наша, и воставшаго за оправдания наша, достойно величаем.
Кондак:
Правило, столп благочестия был еси богоносне Дионисие, явив в себе образ и пример преуспеяния добродетели и подвигов: сею евангельскою мрежею многих уловил еси подражателей, подая блестящею на небеси славою своею ревность к содействованию на пользу правоверных, темже мы ныне воспевающе сия, молим тя, да ходатайствуеши о благочестивейшем Нашем ИМПЕРАТОРЕ, имярек, и о всем церкви исполнении.
Песнь 7. Ирмос:
Росодателну убо пещь содела аггел, преподобным отроком, халдеи же попаляющее веление Божие, мучителя увеща вопити: благословен еси Боже отец наших.
Златолюбиваго економа дерзнувшаго оболгати тя царю и патриарху, во еже святое обители стяжание неправедно отъяти, претерпев темницу и раны, делами своими низложив, явился истинный должнаго назидания строитель.
Хитросплетенныя козни сокрушив, не убоялся гнева царева и патриархова, показав озлоблениями своими обстоящую их лесть и коварство, сказал пути правды евангельския.
Еда паки бездна беззаконий наших призва бездну гнева правосудия Божия, и егда не бысть ни града, ни веси, ни дебри, еже бы укрытися Христианом, восхоте Бог показати силу свою не в силе констей, но в небранных воинах противныя сотре, препоясав силою своею подвижников Лавры Сергиевой.
Слава:
Преста волнений отечества нашего буря, егда явишася вернии по вере кормчии, мудрый Иоасаф,
ревностный Аврамий, и усерный по Бозе Дионисий, егоже ныне чтуще память, благословляем тя Боже России.
Богородичен:
Благословен Христос плод чрева твоего, Богородице дево, яко под его знаменем ополчающиеся побеждают видимых и невидимых врагов
Песнь 8. Ирмос:
Из пламене преподобным росу источил еси, и праведнаго жертву водою попалил еси: вся бо твориши Христе токмо еже хотети: тя превозносим во вся веки.
Паки ты в озлоблениях и муках от врагов истины, тебе яко правдолюбцу содеянных, быв целый год, подвизаяся о сохранении Божия слова, в спасение наше преданнаго, показал нам пример, да и мы в житейском море бурею против нас дышущею напаствуемы, такожде ополчившись противостанем кознем, и достигнем тихаго вечнаго пристанища.
Престаша иногда дышать злобою братию на Иосифа, егда бе во спасение им: и он предав забвению обиду прообразовал кротость евангелия: се новый Иосиф, быв истинно усердный житомеритель
благословенному граду Москве, и окрестным весям гибнущым от глада: но мудрейшии сынове века сего не престаша от злобы на правду, за нюже стоял еси Дионисие блаженне.
Истинно рек вопросившым тя, како бысть толикое твое бедствование; сказав, беды и напасти в веце сем, не суть беды и напасти: но суть искус Божий. воистинну тако: яко бо злато в горниле искушаемое бывает светлее: такожде и ты быв искушен, избегнув истинной беды геенской, явился светлее во светлостях святых. тем же и нас искушаемых убеждаеши ревновати славе твоей.
Слава:
Терпя потерпел еси, и ти внят Господь, и постави нозе твои на камень церкви своея, и исчезоша врази твои, и вложи во уста твоя песнь, во еже с верными глаголати: аще есть Бог судяй на земли: убо есть плод праведнику, и путие его прави суть.
Богородичен:
Вся наша добрая дела были вменены за ничто: аще вы не чрез воплотившагося от тя соделася спасение человеков.
Песнь 9.
Ирмос:
Бога человеком невозможно видети, на негоже не смеют чини аггелстии взирати: тобою бо всечистая явися человеком, слово воплощенно, егоже величающе, с небесными вои тя ублажаем.
Не умолчим и сего. чтя память преподобнаго, коль велие име он попечение, подражая праведному Товии, о погребении мертвых, избитых от врагов отечества нашего: и каков бе его подвиг в лечении от них же измученных ранами; сам исхождаше с братиею нощию, и врачеваше язвы их, елико мощно бе.
Третие явися обитель дивнаго Сергиа, щит и ограждение верной России, жертвуя праведными своими стяжаниями. сим примером возжегошася истинныя чада России: и умилившеся ея грамматами, Пожарский и Минин скоро потекоша на избавление отечества. темже и ныне блаженне Дионисие моли Бога, да отечество и киновия сия будут непреодолимы.
Глаголют нечестивии, яко во времени вся гибнут, право глаголют: погибнут бо с помышлениями своими: но в память вечную будет праведник, и правда его пребудет во век. темже и мы ублажаем тя отче Дионисие, и чтем святую память твою, ты бо своим примером и нас руководствуеши к небеси.
Слава:
Вся сия почтен быв во времени, похвален и от вселенских Патриарх, из нихже от Иерусалимскаго получил еси клобук его патриаршеский: но блаженнее явился, егда умирая о Господе, воспевал пасху твою, глаголя: умрети ми приобретение есть, тчение соверших, веру соблюдох. темже и воспеваем тя сподобившагося венца небеснаго.
Богородичен:
Упование христиан пресвятая Дево, егоже родила еси Бога, непрестанно моли с вышними силами исправление жития подати, и оставление грехов, верою и любовию присно тя славящым.
Молитва преподобному отцу Дионисию
От младых ногтей возлюбивый Христа преподобный Дионисие! сотвори молитвами своими, да и наши сердца священным любви Божия огнем пламенеют, не токмо в юности, но и в старости да не погасают, возжигаемы теплотою веры. Возложивый на ся подвижниче ярем евангельский, и оный обретши благим и легким, до конца оный мужественно совершил еси, сподобившись венца торжественнаго яко победитель: и нам помоги, тягостное время жития сего мужественно понести, и соблюдши веру до конца, сподобитися милосердаго от Бога воздаяния. Быв тщательный и ревностный звания от Бога тебе возложеннаго исполнитель, помози и нам, проходити звания нашы, неослабно, покрепляя нас упованием помощи на Всесильнаго. Многие козни и страдания от злокозненных врагов великодушно претерпевый, святе Дионисие: и нам окружаемым сетями вражиими, и различным искушениям подлежащым, молитвами твоими испроси свыше помощь на побеждение и попрание оных. Всегда умерщвляя постом, молитвами и бдением плоть свою, оживил еси душу свою, и оную соделал еси храмом животворящаго Духа: и нас святый пример твой да возбуждает подражати следам твоим, и улучити время к покаянию и оставлению грехов наших. Быв горящий к славе церкви и отечества ревнитель, исходатайствуй молитвами своими мир церкви, благоденствие отечеству, благословение Самодержавному ИМПЕРАТОРУ Нашему, обитали же сей, твоим правлением благоустроенной и защищенной, всемогущее покровительство: да прославляем прославльшаго тя Господа, ныне и присно, и во веки веков. Аминь.
