Акафист иконе Пресвятой Богородицы Августовская
Июнь 2nd 2014 -
Кондак 1
Взбранной Воеводе победительная, яко избавльшая от гибели в лесу Августовском Христолюбивое воинство русское, благодарственно взываем Ти: яко имущая державу непобедимую, от всяких нас бед свободи, зовущих:
Радуйся, Матерь Божия «Августовская Победа», верным в бранях помогающая.
Икос 1
Яко в лета древние, тако и ныне Христианам помощница и защитница явилася еси, Пресвятая Дева, не остави и нас, взывающих Ти:
Радуйся, в бранях с супостатами помогающая;
Радуйся, Крестным знамением врагов наших устрашающая;
Радуйся, Царица Небесная, на земли воинствующим помощница скорая;
Радуйся, в видении русским воинам явившаяся;
Радуйся, воинств чуждых сокрушение;
Радуйся, русских сил умножение;
Радуйся, Матерь Божия «Августовская Победа», верным в бранях помогающая.
Кондак 2
Во дни лютой брани с полчищами германскими, поднявшимися от западных предел славянское знамя растоптать, корону русскую сокрушить и народы Православные поработить, явилась в ночном небе в лесу Августовском русским ратникам Царица Небесная, на ополчение против иноверных призывающая. Мы же, чудное знамение сие прославляющие, к чудес подателю Богу взываем: Аллилуиа.
Икос 2
В звездном небе, яко яркая звезда воссияла еси, Пресвятая Дева, русским воинам в сиянии Креста явившаяся и на запад путь им указавшая, и в сердца их мужество вселившая. Мы же, милости Твоей дивящеся, в умилении сердец наших взываем:
Радуйся, страну Российскую, яко Дом Свой, святыми иконами дивно украшающая;
Радуйся, образами Своими вся пределы Российские чудесно защищающая;
Радуйся, в Доме Своем людям чуждым владычествовать возбраняющая;
Радуйся, Сына Твоего о нас молящая;
Радуйся, яко звезда в нощи греховной блуждающим сияющая;
Радуйся, яко гром врагов устрашающая.
Радуйся, Матерь Божия «Августовская Победа», верным в бранях помогающая.
Кондак 3
Яко пресветлая звезда воссиял в ночи скорбей Твой дивный образ, Богородица. И люди русские, видение сие зрящие, в благоговении колена своя преклоняют и крестное знамение творят, и к Богу взывают: Аллилуиа.
Икос 3
Радость и ликование объяли сердца русских воинов, когда узрели в небе Царицу Небесную с Богомладенцем Христом, десницею Своею им путь на запад указующую и к битве с супостатом призывающую. Мы же, колена сердец своих преклоньше, радостно Тебе поем:
Радуйся, окруженных врагами от плена свобождающая;
Радуйся, страждущих от неисцельных ран исцеляющая;
Радуйся, отчаявшимся надежду подающая;
Радуйся, за Отечество павших венцами нетленными венчающая;
Радуйся, в скорбях нас утешающая;
Радуйся, молитвам нашим внемлющая.
Радуйся, Матерь Божия «Августовская Победа», верным в бранях помогающая.
Кондак 4
Ангелы на небесах удивились, видя мужество людей русских в Августовском лесу на поле брани малым числом победу над полчищами неприятельскими одержавших. Русские же ратники не себе, но Царице Небесной славу воздают, и в радости Богу поют: Аллилуиа.
Икос 4
Яко Гедеон, предводитель воинства Израильского, малым числом победу над врагами одержал, дабы не себе, но Богу воздали славу сыны иудейские, тако и ныне Новый Израиль в Августовском лесу малым числом неисчислимые полчища германские поборол, врагов вспять обратил, землю Польскую своей победою изумил, Царице Небесной победно воспевающе:
Радуйся, врагов наших вспять обращающая;
Радуйся, воинству русскому победу дающая;
Радуйся, пред Престолом Божиим за нас ходатайствующая;
Радуйся, побежденных милующая;
Радуйся, вражию гордыню сокрушающая;
Радуйся, победами людей Своих прославляющая;
Радуйся, Матерь Божия «Августовская Победа», верным в бранях помогающая.
Кондак 5
И в наши дни по молитвам матерей и жен пред Пречистым образом Твоим, «Августовская победа» именуемым, русским воинам во бранях помощь подаешь, от агарянского пленения избавляешь, Мати Света. В далекой Сибири материнскую молитву пред иконою Твоей услышавшая, и сына ее в Кавказскоих горах дивным явлением Своим от внезапной смерти защитившая, и этим чудом икону «Августовская победа» вновь прославившая, ныне и нас призываешь сей образ прославлять и к Богу взывать: Аллилуия.
Икос 5
Яко на крыльях голубиных долетела весть о победе Августовской до Благоверного Православного Государя Николая Александровича и до Святителя Московского Макария. Они же победе той возрадовались, Богу славу воздали, Царицу Небесную возблагодарили. И повелели по всей Державе Российской иконы о сем явлении писать. Ныне же и мы на те иконы взирающе Царице Небесной поем:
Радуйся, Державы Русской охранительница;
Радуйся, Православных Государей покровительница;
Радуйся, народа русского заступница и утешительница;
Радуйся, в дни лихолетий и смут страны нашей правительница;
Радуйся, в дни браней за Святую Русь воительница;
Радуйся, рубежей наших защитница.
Радуйся, Матерь Божия «Августовская Победа», верным в бранях помогающая.
Кондак 6
Не только в битве Августовской, но и во все времена русским воинам незримую помощь даровала еси, Богородице. Мы же Твои неисчетные милости к нам воспоминающе, Богу победную песнь поем: Аллилуиа.
Икос 6
Во дни испытаний и смут, нашествия иноплеменных и междоусобных браней к Тебе, Пречистая Дева, взываем мы и поем:
Радуйся, от конечного разорения татарского землю русскую избавившая;
Радуйся, у стен осажденных градов наших русским воинам являвшаяся и на бой их поднимавшая;
Радуйся, во время Смуты русскому ополчению незримую помощь Свыше даровавшая;
Радуйся, двунадесять язык от пределов Российских отгнавшая;
Радуйся, над Царицын-градом во второе германское нашествие в небе победно явившаяся;
Радуйся, междоусобную брань в русской столице дивно прекратившая;
Радуйся, Матерь Божия «Августовская Победа», верным в бранях помогающая.
Метки: Богородица
Pages: 1 2
