Молебен святому апостолу и евангелисту Иоанну Богослову. Сщисп. Афанасий (Сахаров)
Март 14th 2011 -
Слава: тропарь Апостолу, глас 2:
Апостоле Христу Богу возлюбленне, ускори избавити людей безответных. Приемлет тя припадающа, Иже падша на перси Приемый, Егоже моли, Богослове, и належащую мглу языков разгнати, прося нам мира и велия милости.
И ныне: Союзом любви...
Псалом избранный апостола:
Возлюблю Тя, Господи, крепосте моя (17:2). Готово сердце мое, Боже, готово сердце мое (56:8). Возжада Тебе душа моя (62:2). Прильпе душа моя по Тебе, мене же прият десница Твоя (62:9). Изчезе сердце мое и плоть моя, Боже сердца моего и часть моя, Боже, во веки (72:26). Искусил еси сердце мое, искусил мя еси, и не обретеся во мне неправда (16:3). Сердце чисто созижди во мне, Боже (50:12). Безвестная и тайная премудрости Твоея явил ми еси (50:8). Согреяся сердце мое во мне, и в поучении моем разгорится огнь (38:4). Глас даша облацы, глас грома Твоего; осветиша молния Твоя вселенную (72:18-19)10. Возвестите во языцех славу Его, во всех людях чудеса Его (95:3). Услышите сия вси языцы, внушите вси живущии по вселенной (48:2). Во всю землю изыде вещание их, и в концы вселенныя глаголы их (18:5). Долготою дней исполню его и явлю ему спасение Мое (90:16).
И поем канон святому Апостолу из минеи, глас 2-й, на нем же припев:
Святый апостоле и евангелисте Иоанне Богослове, моли Бога о нас.
По 3-й песни катавасия:
Моли Бога о нас, святый апостоле и евангелисте Иоанне Богослове, яко мы усердно к тебе прибегаем, скорому помощнику и молитвеннику о душах наших.
Ектения сугубая:
Помилуй нас, Боже...
Господи Боже наш, милостивно, яко благ, призри на изсохшую в любви землю сердца нашего, тернием ненависти, самолюбия и неисчетных беззаконий люте оледеневшую, и каплю благодати Пресвятаго Твоего Духа испустив, богатно ороси сию, да будет плодоносна11 и возрастит от горящей к Тебе любви корень всех добродетелей, страх Твой, и о спасении ближняго неленостное попечение, всех же страстей и многообразных лукавств и лицемерия искоренение, прилежно, яко всех благ Дателя, молим Тя, скоро услыши и человеколюбно помилуй.
Заповедь Твою любити друг друга давый Твоим ученикам, Владыко, обнови сию благодатию Пресвятаго Твоего Духа действенно в душах и в сердцах наших, да николиже о своей точию пользе, но всегда о благоугождении Тебе и о спасении и пользе ближних наших попечение творити потщимся, молимся Тебе, Благодателю Милостивый, услыши и помилуй.
Первую и большую заповедь, любити Тебя, Бога и Творца нашего, от всея души, от всея мысли и крепости нашей, и вторую, подобную ей, – любити ближних наших, яко самих себя даровавый нам, Владыко, Сам подвигни нас делом сия исполняти, да Тебе Спасу нашему угождающе и о спасении ближних наших ревнующе, обетованная Твоя благая получим, яко Владыце и Спасу нашему, прилежно припадающе, молимся, скоро услыши и помилуй.
Да совершени в любви к Тебе, Боже наш, будем, к ближним нелицемерную любовь иметь подвигни нас Твоего Духа благодатию, Владыко, к Тебе бо любовь имети мнящий брата же своего ненавидяй – ложь есть и во тме ходит. Тем же, Милостиве, любовию к Тебе и к братии распали души и сердца наша, молимся Тебе, яко милостив, скоро услыши и, яко щедр, помилуй.
Возглас: Яко милостив...
Кондак апостола, глас 2-й:
Величия твоя, девственниче, кто повесть? Точиши бо чудеса и изливаеши исцеления и молишися о душах наших, яко Богослов и друг Христов.
По 6-й песни и катавасии ектения малая, возглас: Ты бо еси Царь мира...
Кондак, глас 5-й:
Пламенем любви к Тебе распали сердца наша, Христе Боже, да тою разжигаеми, сердцем, мыслию же и душею, и всею крепостию нашею возлюбим Тя, и ближних наших яко себя, и повеления Твоя храняще, славим Тя, всех благ Дателя.
Прокимен, глас 7-й:
Возлюблю Тя, Господи, крепосте моя, Господь утверждение мое.
Стих: Бог мой, Помощник мой и уповаю на Него.
Прокимен Апостола, глас 4-й:
Во всю землю изыде вещание их, и в концы вселенныя глаголы их.
Стих: Небеса поведают славу Божию, творение же рук Его возвещает твердь.
Евангелие от Иоанна из зачал 46 и 51. (13: 34-35; 15: 12-14).
Рече Господь Своим учеником: заповедь новую даю вам, да любите друг друга: якоже возлюбих вы, да и вы любите себе. [О сем разумеют вси, яко Мои ученицы есте, аще любовь имате между собою]12. Сия есть заповедь Моя, да любите друг друга, якоже возлюбих вы. Больше сея любве никтоже имать, да кто душу свою положит за други своя. Вы друзи Мои есте, аще творите, елика Аз заповедах13 вам.
И Апостолу Евангелие от Иоанна, зачало 67 (21: 15-25).
Слава: Молитвами апостолов, Милостиве, очисти, множество согрешений наших.
И ныне: Молитвами Богородицы...
Помилуй мя, Боже...
Стихира, глас 2:
Богослове, девственниче, учениче возлюбленный Спасов, молим тя, молитвами твоими нас спасай от всякаго вреда, яко твое есмы стадо.
Посем глаголет диакон:
Спаси, Боже, люди Твоя и благослови достояние Твое, посети мир Твой милостию и щедротами, возвыси род (sic!)14 христиан православных и ниспосли на нас милости Твоя богатыя, молитвами Всепречистыя Владычицы нашей Богородицы и Приснодевы Марии; силою Честнаго и Животворящаго Креста; предстательством честных Небесных Сил Бесплотных; честнаго славнаго Пророка, Предтечи и Крестителя Иоанна; святаго славнаго и всехвальнаго апостола и евангелиста Иоанна Богослова и всех прочих святых славных апостолов; святых славных и добропобедных мучеников; преподобных и богоносных отцев наших; святаго благовернаго равноапостольнаго великаго князя Владимира и всех прочих святых, в земле Русской просиявших; святых праведных Богоотцев Иоакима и Анны, и всех святых; молим Тя, Многомилостиве Господи, услыши нас грешных, молящихся Тебе, и помилуй нас.
Певцы: Господи, помилуй, 12.
Возглас: Милостию и щедротами...
По 9-й песни: Достойно есть... Трисвятое... Отче наш...
Возглас: Яко Твое есть Царство...
Тропарь, глас 3-й: Союзом любви...
И тропарь апостола, глас 2-й: Апостоле, Христу возлюбленне...
Слава: Кондак апостола, глас 2-й: Величия твоя девственниче...
И ныне: Кондак, глас 5-й: Пламене[м] любви...
Ектения сугубая:
Помилуй нас, Боже...
Сице в нас Твою любовь силою благодати Пресвятаго Твоего Духа, всели, Всещедрый Господи, да не точию братию и друзей, но и врагов наших по Твоему Божественному повелению истинно любити и ненавидящим нас благотворити будем, и о спасении их искренно тщатися, молимся Тебе, благости Источниче и человеколюбия Пучина, скоро услыши и яко Благосерд помилуй.
Еще молимся и о еже услышати...
Возглас: Услыши ны, Боже...
Диакон: Господу помолимся.
Певцы: Господи, помилуй.
Предстоятель чтет молитву:
Господи Иисусе Христе Боже наш, давый ученикам Твоим заповедь новую любити друг друга, приими молитву сию во оставление грехов всех нас, правоверных рабов Твоих, и изсякшую в нас к Тебе и к братиям любовь Духом Твоим Святым обнови и крепко сию водрузи в сердца наши, да тою заповеди Твоя исполняюще, не своей пользы на земле искати, но о Твоей славе и о созидании и спасении ближних ревновати будем, да тако в любви и мире со всеми в веке сем поживше, сподобимся, вкупе с угодившими Тебе, – в горних обителях славити Тя, и Безначальнаго Твоего Отца, и Святаго Духа в безконечныя веки веков.
Диакон: Ко святому апостолу и евангелисту Иоанну Богослову помолимся.
Лик: Святый апостоле и евангелисте Иоанне Богослове, моли Бога о нас.
Предстоятель чтет молитву апостолу:
О великий апостоле, евангелисте громогласный, Богослове изящнейший, тайновидче неизреченных откровений, девственниче и возлюбленный наперсниче Христов Иоанне! Приими нас грешных, под твое сильное заступление прибегающих. Испроси у Всещедраго Человеколюбца Христа Бога нашего, Иже пред очами твоими Кровь Свою за нас непотребных рабов Своих излиял есть, да не помянет беззаконий наших, но да помилует нас и сотворит с нами по милости Своей: да дарует нам здравие душевное и телесное, всякое благоденствие и изобилие, наставляя нас обращать оныя во славу Его, Творца, Спасителя и Бога нашего: по кончине же временной жизни нашей, от немилосердых истязателей на воздушных мытарствах да избавит нас, и тако да достигнем, тобою водимии и покрываемии, Горняго онаго Иерусалима, его же славу ты во откровении зрел еси, ныне же в нем нескончаемой радости наслаждаешися. О великий Иоанне! Сохрани вся грады и страны христианския от глада, губительства, земли трясения и потопа, огня, меча, нашествия иноплеменных и междоусобной брани: избави нас от всякия беды и напасти и молитвами твоими отврати от нас праведный гнев Божий, и Его милосердие нам испроси, да вкупе с тобою сподобимся прославляти в невечернем дни Пресвятое Имя Отца и Сына и Святаго Духа во веки веков.
Отпуст:
Христос истинный Бог наш, молитвами Пречистыя Своея Матери, святаго славнаго и всехвальнаго апостола и евангелиста Иоанна Богослова и всех святых помилует и спасет нас, яко Благ и Человеколюбец.
По отпусте лобызаем икону святаго апостола, поюще величание:
Величаем тя, апостоле и евангелисте Иоанне Богослове, любви преисполненнаго и Христом возлюбленнаго, неизглаголанной премудрости учения возгремевшаго вселенной.
Публикация, вступление и примечания
С.А.Ванюкова
ЦИА ПСТГУ, Фонд свт. Афанасия (Сахарова). Ф. I. Оп. 1, 2 (V). №59/1. Машинопись с пометами еп. Афанасия. Л. 34-41.
Примечания:
- Указанные стихи принадлежат пс. 76.
- Подчеркнуто в машинописи.
- Стих 35-й, данный в скобках, отсутствует в тексте Евангелия, приведенном в машинописи, но указывается выше, перед чтением.
- В Четвероевангелии: «заповедаю» (см. Священное Евангелие. М.: Изд. Московской Патриархии, 1984. Л. 178).
- Святителем Афанасием эта опечатка, в отличие от многих других, не исправлена.
Источник: http://files2.regentjob.ru
